СОЦИАЛЬНЫЙ ИЛЫШ ТАЗАЛЫК ЯЛ ИЛЫШ

«Кумылжо эм дечат шергакан»

– Миклай изай, давлениет сай, но тазалыкетым садак эскере, темлыме эмем жапыштыже йӱын шого, – пылышыж гыч фонендоскопым луктын, илалше пациентшын пулышыж гыч тонометрын манжетшым кораҥдышыжла, чолга йӱкын мане Волжский районысо Чодыраял Корамас ялысе ФАП-ым вуйлатыше, акушерке Зинаида Семёнова.

– Йӧра, мутетым колыштам, – вашешыже шыргыжале Миклай иза, вара вуйжым мыйын велыш савырыш. – Зина шӱжарын кумылжо эм дечат шергакан: туге порын вашлиеш, тазалыкым туге сайын терга, туге лывыргын мутлана – тазалык тургыжландарыме нергенат мондет.

Тидлан амалжат уло, вет Зинаида Ильинична мо Йошкар-Оласе медицине колледжым тунем пытарен, эре шке специальностьшо дене пашам ышта.

– Шкеже Полатэҥерыште шочын-кушкынам. Еҥгам Кугу Корамас медпунктышто ыштен. Тудын деке чӱчкыдын коштынам, пашажым кумылын эскеренам да фельдшер лияш шоненам. Тунам колледж огыл, училище ыле. Фельдшерланат туныктен огытыл, сандене еҥгамын темлымыж почеш акушеркылан шинчымашым погышым. 1986 ийыште училищым тунем пытарыме деч вара ик ий Волжский районыштак верланыше Моркыял медпунктышто пашам ыштышым, вара шочмо кундемышкем куснышым. Медициныште пашам ышташ тӱҥалмемлан тений 32 ият теме. Йоча годсо шонымашкем шуынам, – шкеж дене палдарыш Зинаида Ильинична.

Самырык специалистын пашам ышташ толмыжлан Чодыраялыште тоштырак пу медпункт лийын, тудым коҥга дене ырыктеныт. А 2014 ий 19 августышто пеш чапле ФАП-ым почыныт. Кызыт тыште чыла гаяк уло: велосипедым ма машинам, коляскым шогалтыме вер, специалист деке черетым вучалтен шинчаш телевизоран фойе, фельдшерын, педиатрын, акушеркын посна кабинетышт, тылеч посна – прививкым, тӱрлӧ процедурым (ты шотыштак физпроцедурым), перевязкым ыштыме, медицине инструментым стерилизоватлыме кабинет-влак. Кажныжым таче кечылан кӱлешан да келшен толшо у оборудований дене шыҥдарыме.

– Документ дене шукырак шинчылташ логалеш гынат, пашам ышташ палынак каньыле лийын, – каласкала Зинаида Ильинична. – Чодыраялыште да Нурмучаште 553 суртышто илыше 937 еҥым обслуживатлена. Икияш марте 2 йочалан, 75 деч кугурак ийготан 75 еҥлан поснак кугу тӱткышым ойырена. Тунемше, ялозанлыкыште тыршыше-влакынат тазалыкыштым эскеренак шогена. Куштыжо физпроцедурым ыштена, куштыжо – уколым, куштыжо таблеткым монь темлена. Калык мемнам колыштеш, умыла, пагала манын шонем: диспансеризацийымат вуйым шупшде эрта, прививкымат кумылын ышта. Мутлан, тиде сезонышто грипп дене черланыме деч 160 кугыеҥ ден 90 йоча вакцинироватлалтыныт. Калыкым утларакше гипертоний, сакыр диабет, остеохондроз, йора, бронхиальный астме, бронхит, шӱм чер, анемий тургыжландарат, сандене верлашкат шуэн огыл лекташ логалеш. Йӧра, Йошкар-Олаште велосипедым, ечым монь ужалыше Славик шольым кажне ийын йолорвам пӧлекла. Тудым кушкыжын, ӱжмӧ але палемдыме верыш тыманмеш миен толам. Валентина Леонидовна Покровская медсестрамланат паша ситышын логалеш. Кызыт тудо Йошкар-Олаште шинчымашыжым уэмден тунемеш. Икте кумылым волта: тений идалык тӱҥалтыште санитаркын ставкыжым кораҥдышт, сандене 230 утла квадрат метр кумдыкым коктын эрыктена, тылеч посна ФАП йырысе мландым тӱзатена, тушто тӱрлӧ кушкылым ончен кушташ тыршена. Тидланат жап ситышын кая… 

Омса почылто. Кӧргышкӧ иктаж 50 ияшрак вийвал пӧръеҥ пурен шогале. Грипп дечын прививкым ыштыкташ толын. Зинаида Ильинична ончыч тазалыкшым тергыш, вара уколым ыштыш.

– Тыгай прививкым кажне ийын ыштыктем. Полша, шонем, молан манаш гын нелын черланымем ынде мынярымше ий ом шарне, – ФАП вуйлатышылан тауштен, чеверласен лекте пӧръеҥ. 

Умылышым: ФАП яра ок шинче, тышке эре ала-кӧ да пурен лектеш…

– Кечыште кокла шот дене 26 еҥ толеш. Утларакше Сотнур эмлымверын специалистше-влак темлыме почеш уколым ышташ логалеш – тылзыште 700-8000 марте. Ме пашалан вуйым огына шупш, тӱҥжӧ – калык таза лийже, шуко илыже, – чон почын манеш Зинаида Семёновна.

М.ИВАНОВА.

Авторын фотожо.

 

Опубликовать в Одноклассники

Добавить комментарий