КУЧЕМ УВЕР

Ешартыш оксам кондаш полшышаш

Марий Эл вуйлатыше Александр Евстифеев кодшо кугарнян Звенигово районыш миен. Тушто Кокшайск селаште портым чоҥымо йодышым каҥашеныт, палдара Марий Эл Республик вуйлатышын организаций да аналитике виктемже.

Александр Евстифеев ончычсо пассажир пристань кумдыкым ончен савырнен. Бизнесъеҥ-влак дене пырля грузопассажирский причалым чоҥымо да воктенысе кумдыкышто туристический инфраструктурым вияҥдыме инвестиций проектым илышыш шыҥдарыме йодыш нерген мутланеныт.

Инвестор Николай Тетеринын мутшо почеш, застройщик-компаний тиде проектым илышыш пуртышашлан 800 млн. тенге шке оксажым пышташ ямде. Шонымо почеш, ончыкыжым тыште пассажирский да грузовой причал-влак, тыгак яхт-клуб лийшаш. Чоҥымо паша икмыняр йыжыҥ дене эртаралташ тӱҥалеш. Икымшыже эн кугу да экономически пайдале лийшаш – тиде сатум ястараш условийым ыштымаш. Ончыкыжым эҥерысе грузовой порт гоч Марий Элыш да тудын деч ӧрдыжкӧ тӱрлӧ грузын тӱҥ ужашыже кайышаш.

– Ошма, тыгыде кӱ, шаргӱ, металл, пырче, конструкций-влак – тачысе кечылан Юл эҥер дене Астрахань гыч Санкт-Петербург марте мо кая, ончыкыжым тыште ястараш лиеш. Мемнан шотлымына почеш, идалыкаш оборот 800 млн. гыч 1,5 млрд. теҥге марте лийын кертеш. Тышеч республикын бюджетышкыже 200-300 миллион те‰ге налог окса пура, – каласен Николай Тетерин.

Тиде портым чоҥымаш Звенигово районын экономикыжым веле огыл вияҥдаш полша, тыгак Марий Элыште вӱд туризмым вияҥдымаштат у ошкыл лиеш.

Республик вуйлатыше ушештарен: идалык ончыч Волгоградыште Россий Федераций правительстве председатель Дмитрий Медведев  Юл эҥерым арален кодымо, пайдалын кучылтмо да лавыраҥдыдыме дене кылдалтше йодыш-влак шотышто совещанийым эртарен. Тидын дене кылдалтше кужу жаплан ямдылыме проектым илышыш пурташ чылаже 257 млрд. тенге ойыралтеш.

Кокшайск селаште портым чоҥымо да инвестиций проектым илышыш пуртымо дене кылдалтше йодышым республикын правительствыштыже октябрь мучаш марте каҥашаш тӱҥалыт.

Л.Камалетдинова.

Опубликовать в Одноклассники

Добавить комментарий