УВЕР ЙОГЫН

Кӱчык ӱмырым илен

Александр Конаков лӱмеш Шернур тоштер-ончер комплексыште марий поэт да кусарыше Иван Андреевич Антоновын (Ивук Антонов) шочмыжлан 100 ий темме лӱмеш шарнымаш кас эртен.

Иван Антонов 1918 ий 6 сентябрьыште шочын. Мустай школ деч вара Марий педагогический институтышто шинчымашыжым нӧлтен. Студент годымак литературный кружокыш коштын, шуко почеламутым серен. Тӱҥ шотышто почеламутшо-влак тыглай илыш, пӱртус, икшыве-влак нерген лийыныт. Тудын произведенийже-влак «Марий коммуна», «Молодой коммунист» газетлаште савыкталтыныт.

1941 ийыште поэтым Марий Республикылан 20 ий темме дене кылдалтше серышым И.В.Сталинлан возымашкат ушеныт улмаш. Мутат уке, тидыже тудын талантше нерген ойла. Кугу Отечественный сар годым Ивук Антонов сарыш каен. Кок тылзе наре резерв полкышто служитлен, вара шинча черлан кӧра тудым демобилизоватленыт. Мӧҥгышкыжӧ пӧртылшыла, Йошкар-Олаште илыше йолташыже деке пурен. Тушто туткар лийын. Тудо шикш дене аярген да илыш гыч каен.

 Иван Андреевич Антонов 23 ий веле илен шуктен, но марий сылнымутышто кышажым коден. Колымыж деч вара кок книгаже ош тӱням ужын: 1948 ийыште «Пиалан жап», 1954 ийыште «Почеламут сборникше» лектыныт. А тудын «Когда перед окнами желтеет береза» почеламутшым хрестоматийышкат пуртеныт.

    Уста поэтым шарныме касыш Россий Писатель ушемын еҥже-влакат миеныт – Зинаида Ермакова, Анатолий Мокеев, самодеятельный мурызо да композитор Анатолий Мамаев, туныктышо да краевед Валентина Кузнецова. Мероприятийыште поэтын илыш корныжым, творчествыжым шарналтеныт. Мурызо да самодеятельный композитор Анатолий Мамаев, поэтын тукым шольыжо, юбилярлан пӧлеклалтше муро-влакым йоҥгалтарен.

 С.Носова

Снимкыште: шарнымаш кас годым.

 

 

 

 

 

Опубликовать в Одноклассники

Добавить комментарий