УВЕР ЙОГЫН

Чуваш Республик гыч творческий делегаций Йошкар-Олаш толын

Кодшо кугарнян  Чуваш Республик гыч творческий делегаций толын каен. Тӱҥ амалже – чуваш уна-влак Йошкар-Ола, тудын тӱвыра поянлыкше, ты отрасльыште ыштыше-влак дене палыме лиймаш. Делегацийыште тӱҥ шотышто тӱвыра, театр, тоштер, библиотек пашаеҥ-влак лийыныт. Тудым Чуваш  Республикын тӱвыра, калык-влакын  да архив паша шотышто министржын алмаштышыже Елена Чернова вуйлатен.

 Йошкар-Олаште нуным эн ончыч Марий Элын тӱвыра, печать да калык-влакын пашашт шотышто министрын алмаштышыже Михаил Матвеев, Т.Евсеев лӱмеш национальный тоштер директор Светлана Зверева, республикысе Марий тӱвыра рӱдер вуйлатыше Наталья Пушкина Пресвятой Дева Мариян площадьыштыже вашлийыныт. Тӱвыра рӱдерын «Чон оҥгыр» фольклор ансамбльже пайрем кумылым нӧлтен, калыкнан койыш-шоктышыжо, йӱлаже дене палдарен. Уна-влакым коман мелна дене сийленыт.

 Вара толшо-влакым поян экскурсий программе вучен, вет Йошкар-Олаште уло мом ончыкташ. Нуно Благовещений башьныште, Патриарший площадьыште, Эрик Сапаев лӱмеш опер да балет театрыште, Т.Евсеев лӱмеш национальный тоштерыште, национальный президент школышто, художественный галерейыште лийыныт. Икманаш, кече мучко Йошкар-Олам тӱрыс ончал савырненыт.

Кастене нунын дене Творческий ушем-влакын пӧртыштышт Марий Элын тӱвыра, печать да калык-влакын пашашт шотышто министрже Константин Иванов, алмаштышыже-влак Михаил Матвеев, Галина Ширяева вашлийыныт. Тушко тыгак республикысе творческий организаций вуйлатыше-влак толыныт ыле. Мутланымаш кок республикысе тӱвыра да искусство, туризм пашаеҥ, министерстве-влак коклаште кылым пеҥгыдемден толмо йыр пӧрдын. Мучашлан, Чуваший гыч толшо-влак шарнымашан пӧлекым налшыла, мемнан тӱвыра пашаен-влакым шкешт деке унала ӱжыныт да вучаш сӧреныт.

 С.Носова.

 Р.Николаеван фотожо.

Опубликовать в Одноклассники

Добавить комментарий