КУЛЬТУР ДА ИСКУССТВО ТЕАТР

Олык Ипай лӱмеш Кугыжаныш премийлан темлалтеш: Театр сценыште – «Шкет кукун мурыжо»

30 сентябрьыште Марий самырык театрын сценыжым лач тиде спектакль сӧрастараш тӱҥалеш. Йодыш лектеш: театрыште у тургым эше почылтынат огыл, а «Шкет кукун мурыжо» музыкальный спектакль калык ончыко лектешат. Могай амал? Йодышлан вашмутым муаш манын, спектакльыште тӱҥ рольым модшо актрисе Татьяна ПОПОВА дене вашлийын мутланышна. 

Тургымым почмо деч ончыч молан тиде спектакль ончыкталтеш?

– Марий Эл Республикына тений Олык Ипай лӱмеш Самырык-влакын Кугыжаныш премийжылан черетан конкурсым увертарен. Тиде конкурсышко  театрна «Шкет кукун мурыжо» музыкальный драмыште мыйын чоҥымо пашамым темла. 30 сентябрьыште премийын комиссий членже-влак постановкым ончаш толыт, модмемым, спектакль чоҥымаште мыйын надырем аклаш тӱҥалыт.

– Тиде спектакльыште тӱҥ рольым модат, тӱҥалтыш гыч мучаш марте сценыште улат, тыгодымак шуко мурым йоҥгалтарет…

– Муро деч посна спектакльым эше келге шонымашан шуко оҥай куштымаш сӧрастара. Вес семынже лийынат ок керт. Вет мыйын модмо тӱҥ героиня Луиза, самырыкше годым ялысе ӱдыр Лиза, кызыт кумдан чапланыше мурызо, эстрадын шӱдыржӧ. Тудын чумыр илышыже муро да куштымаш гочын калыкын рӱж кид совымашеш эртен. Сандене спектакльыште Луизан илышыже тӱҥ шотышто лачак муро-куштымаш да, мутат уке, кӧргӧ драматизм гочын почылтшаш.

– Рольым чоҥымо годым шуко пӱжвӱдым йоктараш логалын, очыни.

– Пашам йӧратен ыштет гын, пӱжвӱдшат лач куаным конда. Адакшым тиде спектакль шочмаште эн ончычак самырык творческий вий тыршен. Тиде – самырык драматург Татьяна Соловьёва, самырык режиссёр Эрвина Гордеева, самырык балетмейстер Анастасия Китаева.

– … Да самырык актрисе Татьяна Попова…

– Сандене мыланна, неле гынат, весела лийын.

– А кызыт сценышке лекташ?..

– Кеҥеж жапыште, мутат уке, спектакльым калык ончылно модмо огыл, сандене кызыт угыч репетиций-влакым эртарена. А такшым, теҥгече модмо лиеш гынат, кажне гана сценыш лекме годым чон лектын вочшашла вургыжеш. Вет тушто тыйын модмо героетын чумыр илышыже почылтеш… Почылтеш да эрта тыйын кӧргет гоч, чынрак каласаш гын, тый тудын чумыр илышыжым илен эртарет, тудын семын вургыжат да шортат, але йӧратет да куанет…

Кодшо тургымышто «Шкет кукун мурыжо» спектакльым мыят чон вургыж онченам. Тунам шкаланем теве мом палемдышым: Татьяна Попован мурымо йӱкшӧ чылт Эльвира акажын гай.

– «Акажын гай» – каласен шындышда. Йоҥгалтме шот дене, можыч, икгай, но мастарлык могырым… Вет акам – профессиональный мурызо, а мый эн ончычак – драматический актрисе. Сандене акам гай мастарын мураш мылам эше шуко пӱжвӱдым йоктарыман. Такшым, тудо мылам мурымо мастарлыкым шуарымаште эре полша.

Вашештыметлан тау, Таня. Мурымо мастарлыкымат, драматический актрисе мастарлыкымат курык гае кугум, кава гае кӱкшым тыланен кодам. Ончыкыжымат шке талантет дене калыкнам куандарен шого.

Алевтина БАЙКОВА.

Опубликовать в Одноклассники

Добавить комментарий