ГАЛЕРЕЙ МЕР ИЛЫШ

Йӱдвел чекыште Кукнур пайрем гӱжлен

Идалык мучко республикыштына могай гына сынан культур да спорт мероприятий огеш эртаралт. Ял ма села пайремат шуко вере гӱжла. Шочмо кундемыш утларакше вич ийлан ик гана але ик ий коден чумыргат, пошкудо дене вашлийыт. А теве Шернур районышто Кукнурын кечыжым ынде 25-ше ий почела кӱрылтде эртарышт. Ты пайрем лач тушто шочын-кушшо, илыше-влакым гына огыл чумыра. 

Ынде ятыр ий торжественный парадыш спортсмен-шамыч деч посна пашан ветеранже, чапланыше земляк ден пагалыме уна-влакым луктыт. Нунын коклаште ӱмырышт мучко ялозанлык, туныктымо пашаште, медициныште тыршыше-влак улыт. Теве Н. Купсольцева 40 ий утла  фельдшерлан ыштен, пайремыш марий тувырым чиен толын. «Тыгай кугу пайремыште икымше гана парадыш лектынам. Колымешкем шарнен илаш тӱҥалам…» манын каласен шинчавӱд йӧре Нина Михайловна.

Пайрем дене Шернур район муниципальный образованийым вуйлатыше Г. Яндулов, Кукнур ял шотан илемым вуйлатыше Л. Долгушев, Лошкари администрацийым вуйлатыше С. Смоленцева саламленыт.

Кукнур волостьын кубокшо верч футбол турнир коло визымше гана эртыш да тӱрлӧ кундем гыч 9 команде (Шернур район Чылдемыр, Лажъял, Кукнур (кокыт), Шернур поселко (кокыт) Киров кундем Пижанке район Безводный села, Советский район «Рассвет», Оршанке педколледж) таҥасыш. Верысе футболист-влак чотак куандарышт. «Кукнур-1» (капитан – А. Виноградов) кубокын озаже, а «Кукнур-2» кокымшо лийыч. Икымше командын вратарьже К. Пехметов эн сай голкипер семын палемдалте. Кумшо верым  Безводный гыч команде нале.

Каласыман, тений Кукнур команде районышто кеҥежымсе чемпионатыштат 1-ше, «Сокол» командын ончычсо капитанже Б. Антроповым шарныме лӱмеш турнирыштат 1-ше лийын.

Ӱдырамаш баскетбол спортзалыште огыл, а школ стадионыштак эртыш. Игечыжат пеш келшыше ыле. Футболым ончышо-влак иканаште тиде таҥасымашымат эскерен кертыныт. Верысе-влак кумшыш лектыныт гын, кубокым Марий Турек вел ӱдыр-влак сеҥен нальыч. А кокымшо вер дене Шернурысо 1-ше номеран школын тунемшыже-влак палемдалтыч. 

Ты пайремыште шахмат турнир ик эн «шоҥго». Тудо 23-шо гана эртаралте. Кукнур школышто спортын тиде видше дене эреак модыныт да кызытат вияҥден толыт. Тений школ иканаште кум командым модаш луктын да чемпион лӱмым сеҥен налын. Кугурак коклаште Морко районысо «Смена» сеҥыш, оза-влакым пел очколан ончылтыш.

16 килограмман кирам нӧлтымаште тӱҥ айдеме – Юрий Зонов, Йошкар-Ола гыч амалкалче. Кажне ийын кум верлан мешак дене сакыр ложашым,  ош ложашым, рисым пуа. Тений шкеже миен кертын огыл гынат, пӧлекшым садак колтен. Пошкудо Актун ял гыч А. Темешев кок ий ончыч Кукнур кечыште кирам 125 гана  нӧлталын гын, тений шке рекордшым уэмден  – 160 гана нӧлталын.

Тӱрлӧ дистанцийыште куржталмашке верысе ял шотан илем кумдыкысо ялла гыч команде-влак ушненыт да икымше верыш Чисола гыч ӱдыр-рвезе-шамыч лектыныт. Ветеран ден уна-влак да молат ВЛКСМ-лан 100 ий темме лӱмеш 100 метрым куржын эртеныт.

Приз ден пӧлек дене предприниматель-влак Ю. Зонов, Е. Савинцева, землякна-влак Л. Конаков, А. Антонов, В. Мочаев, А. Мурашов, верысе кевыт оза-влак, «Северный» ялозанлык предприятий (вуйлатышыже М. Алгаев) полшеныт. А оргкомитетым чумырымо да тудын пашажым виктарыме йодыш верысе культур пӧрт вуйлатыше, ялысе депутат-влак погынымашын депутатше А.Конаков ӱмбаке возын.

Спорт таҥасымаш-влак эртыме жапыштак стадионыштак Свизын пазар ден «Шыжын поянлыкше» выставке-конкурс почылтыныт. Туштак «Марий кочкыш» конкурсын участникше-влак ойыртемалтше чесышт дене куандареныт. «Пелед, тӱзлане, шочмо кундемем» концертыште Марий Элын сулло артистше Р. Данилова, самырык мурызо да гармоньчо М. Веселов, пошкудо Лошкари культур пӧртын коллективше куандарышт.

Сурт-печым эн сайын сӧрастарен кучышо еш-влакымат (Кукнур гыч – Киткаевмытым, Купсола гыч – Конаковмытым, Пасеевмытым, Федоровмытым, Аҥанур гыч – Актугановмытым, Чисола гыч – Пехметовмытым) диплом да пӧлек дене палемденыт. 

Марий кундемнан ик эн мӱндыр ял ден селаштыже, пошкудо регионла дене чекланыме верлаште, шочмо йӱлам, культурым арален кодышаш верч тӱрлӧ йӧным кучылтыт. Теве Морко район Унчо кундем эсогыл финн-угор тӱнян рӱдыверже конкурсышто сеҥышыш лектын, да вес ийын ты амал дене тушто шуко мероприятий лиеш. А Йошкар-Ола деч 200 километр наре мӱндырнӧ верланыше Сардаялыште (Марий Турек район) самырык-влаклан Россий кӱкшытан фестиваль-кружокым эртарымышт дене шочмо кундемыштым чапландараш, тургыжландарыше йодышыштым почын пуаш йӧным ыштеныт.  

25 ий жапыште Кукнур пайрем у деч у сыным налеш. Спорт ден культурым ик аланыш ушен эртарыме мероприятий умбакыжат таза илыш йӱлам кучаш, кугезе марий койышым, ыштыш-кучышым, муро-куштымашым арален кодаш полшыжо.

 

Светлана Пехметова.

Авторын фотожо.

Снимкылаште: Пашан ветеранже Н. Купсольцева, Эстафетыште сеҥыше Чисола команде, Пехметовмыт еш Парад деч ончыч Кукнур ял шотан илемым вуйлатыше Л. Долгушев, Ӱдырамаш баскетболын тренерже В. Чепакова, организатор-влак кокла гыч В. Мочаев, туныктышо да тренер Е. Чепаков

«Марий кочкыш» конкурсышто сеҥыше-влак Г. Таныгина, И. Ямбулатова, И. Четкарева

Опубликовать в Одноклассники

Добавить комментарий