ТОШКАЛТЫШ

Анастасия Муравьёва: «Кертмем семын полшынем»

Морко кундемын ӱдыржӧ Анастасия МУРАВЬЁВА шочмо районысо  администрацийжын организаций ден право пӧлкаштыже тӱҥ специалистлан пашам ышта, тыгак МарГУ-што тунемеш. Тудын дене лишкырак июль тӱҥалтыште Шернур район Марисола школышто эртыше Марий самырык тукым слётышто палыме лийынна. 

– Тый тунемат да иканаште пашам ыштет. Иктыже весыжлан чаракым огеш ыште?

– Уке, мӧҥгешла, ончыко каяш, вияҥаш полша. Чыла вере шукташ манын, иканаште икмыняр пашам ышташ логалеш.  Но, мыйын шонымаште, самырык годым тыгак лийман, вет варажым тидлан жапшат тунар огеш лий. Садлан рвезе пагыт деч чылажат налын шуктыман.

– Ончыкылык юрист улат. Содыки молан лач тиде профессийым ойырен налынат?

– Тиде специальность чонемлан лишыл. Тылеч посна тачысе жапыште тудо моткоч кӱлешан, вет законым палымаш шуко пашаште полшен кертеш. Но шкем вес аланыштат тергем. Мутлан, журналистикыште. «Морко мланде» газетыш возкалем.

– Марий самырык тукым слётыш икмыняр  гана ушненат. Тушто лийме тыланет мом пуэн?

– Икымше гана ты слётышто Оршанке район Кугу Ӧрша школышто лийынам. Тунам 1-ше лужана «Айста марла кушталтена» проектым ямдылен. Тудым мый йолташем да администраций полшымо дене Морко районышто илышыш шыҥдаренам. Мероприятий ынде кокымшо ий почела Морко посёлкышто 4 ноябрьыште эрта.

Теве тений слётыш пытартыш кечылаштыже  гына миен кертынам. Омат логал шоненам. Но паша верыште содыки мыйым умыленыт да тушко каяш йӧным ыштеныт. Тидлан мый моткоч куаненам, вет слётышто лийме мылам виктарыме сомылыштем полша, еҥ-влак дене кылым ышташ, лӱдде мутланаш туныкта, марий тӱвырам, йӱлам утларак палаш йӧным ышта.

– Самырык еҥлан кучем органыште пашам ышташ куштылгыжак огыл. Тушко ушнымет годым могай нелылыкым шижынат?

– Мутат уке, тӱналтыште ятыр умылыдымаш лектын. Кеч-могай пашам сайын пален налаш манын, жап кӱлеш. Но йӧратыме сомылым ыштет гын, нимогай нелылык огеш лӱдыктӧ. Шочмо кундемыште илыше калыкемлан кертмем семын  поро пашам ыштымем, полшымем шуэш.

– Школышто марий йылмым тунемын отыл гынат, марий шӱлышан кушкынат. Шочмо тӱвыралан тыйым кӧ кумылаҥден?

– Мый Морко посёлкышто шочынам. Туштак 2-шо №-ан школышто тунемынам. Мыланна марий йылмым туныктен огытыл. Но мӧҥгыштӧ ача-авам мый денем марла гына мутланеныт, садлан шочмо йылмем нигунамат монден омыл. Тау нунылан. Шочмо тӱвырана, йылмына, йӱлана аралалт кодшо, курым дене илыже манын шонем. Тидланак кӧра марий ача-ава-влакын икшывышт дене рушла кутырымыштым колын, шӱлык кумыл лектеш. Но марий кумылан самырык тукым але уло. Ӱшанем, тыгай еҥ-влаклан кӧра калыкна огеш йом, шке ойыртемжым, поянлыкшым арален коден кертеш.

– Тугеже мом шонен пыштымет шукталтше.

– Тау.

Лидия ШАБДАРОВА.

М.Скобелевын фотожо.

Опубликовать в Одноклассники

Добавить комментарий