УВЕР ЙОГЫН

Килемар районышто сапропельым лукмо шотышто инвестиций проект илышыш шыҥдаралтеш

Марий Эл Республикым вуйлатыше Александр Евстифеев Килемар районысо сапропельым лукмо Водоозёрский местрожденийыш миен коштын да тусо паша дене палыме лийын. Ер йымач пӱртӱс поянлыкым лукташ тӱҥалме деч ончыч кугу паша эртаралтын. Геологий велым тушто тудын могай кугыт аралалтымыжым шымлаш кӱлын. Рашемын: ты местрожденийыште 45 ий наре пашам ышташ лиеш.

Сапропельым лукшо предприятий директор Михаил Русовын ойлымыж почеш, ты ерлан 25-45 тӱжем ий наре. Тидым сапропель дене пашам ыштыше тӱнямбал рӱдерыштат пеҥгыдемденыт. Ер пундаште сапропель лач тиде пагытыште «ышталтын».

Тудым тыште тений гына лукташ тӱҥалыныт. Ончыч предприятийын пашаеҥже-влак шке гыч земснарядым ямдыленыт, швед насосым шынденыт. Ер пундаш гыч лукмо икымше партий пеш сай качестванжак лийын огыл, пашажымат шуко ышташ кӱлын.

 Но тений шошым пашашт вораҥын. Ончыч геотуб манме кугу да лопка мешаклаш ваккум насос полшымо дене пундаш гыч йошкыным тулат. Мешакын куэмже гоч вара эркын вӱдшо кая, а сапропельже кодеш.

 Директорын ойлымыж почеш, ончыкыжым предприятий ты продуктым тӱрлым ышташ тӱҥалеш: кукшум, пасте, таблетке да косметический сынаным. Кызыт тудым Чебоксарысе ик лабораторийыште фасоватлат.

 – Тугеже кызытеш те эше ты пашам тӱҥалыда, оксам кучылтыда веле. А молан тыштак чыла пашам шукташ ынеда тӱҥал? – йодын регион вуйлатыше. Тидлан директор ӱшандарен вашештен: «Производство тиде участкыште гына вияҥаш тӱҥалеш».

Сатум налше-влакым мумешке, предприятий тудым шке продукцийже дене палдарыме амал дене яра колта. Но пашам ворандарен колтышашлан тушто кок сушилкым налыныт, упаковко цехлан оралтымат нӧлтеныт. Ончыкыжым предприятий куд тӱрлӧ косметический продукцийым ышташ тӱҥалаш палемден. Шке брендше-влакат лийыт:  «Марийская органика» да «Легенда Килемар». Вес ийын предприятий сапропельым у земснаряд полшымо дене лукташ тӱҥалеш.

 Тачысе кечылан тушто кандаш еҥ тырша гын, лишыл жапыште тиде чотым 15 еҥ марте кугемдаш шонат. Предприятий регистроватлалтын, сандене налогымат верысе бюджетыш колта.

Тыштак ончыкыжым эрыктыме сооруженийым чоҥаш шонат. Тунам йоген лекше вӱд кушкыл полшымо дене эрыкталташ тӱҥалеш.  Марий Элын пӱртӱс поянлык, экологий да йырым-йырысе средам аралыме министрже Владимир Шутовын палемдымыж почеш, тиде ер моло деч лачшымак пундаштыже кугу пӱртӱс поянлыкым аралымыж дене ойыртемалтеш. Тидлан кӧрак тушто эсогыл кол уке.

 Килемар район администраций вуйлатыше Людмила Толмачеват тыште сапропельым лукмо пашам ворандарен колтымым, инвестор лекмым сай ошкыллан шотла. Районланат пайдажым палемда. А тыгай ерже Килемар велне шагал огыл. Эшежым сапропельым лукмо паша верысе экологийлан нимогай эҥгекымат ок ыште.

 Мучашлан Александр Евстифеев палемден: «Кундемыштына инвестиций проект-влакым илышыш шыҥдарымаш, у производство-влакым пашаш колтымаш регионышто ситуацийым сай велеке вашталташ полшышаш улыт».

 Марий Эл Республик вуйлатышын организаций да аналитике виктемжын  уверже негызеш С.Носова ямдылен.

Опубликовать в Одноклассники

Добавить комментарий