КАЛАСЕ, "МАРИЙ ЭЛ"

Юрист умылтара: Суд пристав-влак шке пашаштым огыт шукто

Суд пристав-влак ынде пеш кужу жап мыланем парымым пӧртылтымӧ шотышто судын пунчалжым огыт шукто. Кузерак нуным шке пашаштым шуктыктышаш ыле?

А.Муравьев.

Йошкар-Ола.

Йодышлан Йошкар-Ола прокурорын алмаштыштыже Ильдус Алимов вашештен:

– Суд пристав-влак подразделенийын пашаеҥже-влак шке обязанностьыштым огыт шукто гын, те нунын нимом ыштыдымыштым закон почеш обжаловатлен кертыда.  2007 ий октябрьыште лекше «Исполнительный производство нерген» федеральный закон дене келшышын, суд пристав-влакын должностной лицаштын ошкылыштым (нимом ыштыдымыштым)  обжаловатлыме радам ден срок палемдалтыныт. Тыгак тушто подчиненность радам шот дене пуымо вуйшиймаш могай лийшашат ончыкталтын. Сандене те суд пристав- исполнительын нимом ыштыдымыж  шотышто  отделын кугурак суд приставшылан, а тудын шотышто Марий Эл Республикысе Суд пристав-влакын управленийыжым вуйлатышылан вуйым шийын кертыда.

Кӱшнӧ ончыктымо закон почешак исполнительный документ дене кылдалтше ошкыл (але нимом ыштыдымаш) шотышто арбитраж але общий юрисдикциян судлаш йодмаш дене лекташ лиеш.

 Тыгак те шкежат судын пунчалжым шуктышашлык суд пристав, тыгак тудын ыштыме отдел але кӱшнырак шогышо суд пристав вуйлатыше-влак деке йодмаш дене лектын кертыда да рашемдеда: суд актым шуктымо шотышто могай ошкыл ышталтын?

Исполнительный производство шотышто парымым пӧртылтымым кычалше семын правдам пудыртымо да вуйшиймашым пуымо шотышто пунчал дене огыда келше гын, Йошкар-Оласе прокуратурыш йодмаш дене лектын кертыда.

С.Носова ямдылен.

Опубликовать в Одноклассники

Добавить комментарий