УВЕР ЙОГЫН

Марий Элын экономикышкыже 4,5 миллиард тенгеаш инвестиций пурен

Идалыкын икымше кварталыштыже Марий Элын экономикышкыже 4,5 миллиард тенгеаш инвестицийым пыштыме.  

 Регионын инвестиций чолгалыкше могай улмо нерген республик правительствын заседанийыштыже ончен лектыныт. Тудым регион вуйлатыше Александр Евстифеев эртарен.

Тӱҥ капиталлыш пыштыме тенийсе инвестиций кугыт кодшо ийысе тыгаяк пагыт дене таҥастарымаште 635 миллион теҥгелан, але 9,2 процентлан, шукырак лийын. Инвестиций кушмо темп дене Марий Эл Юл кундем федерал окугышто визымше верыш лектын. А кодшо ийысе тыгаяк пагытлан 14-ше верым, Российыште 31-ше верым айлен.

 Республикын  промышленность, экономике вияҥмаш да торговльо министрже Дмитрий Пугачевын ойлымыж почеш, инвестицийын кугеммыжлан обрабатыватлыше производствышто да ялозанлыкыште инвестиций процессын сайрак вияҥын кайымыже полшен. Д.Пугачев Россий Президентын «Россий Федерацийын субъект органже-влакын эффективный пашаштлан акым пуымаш нерген» лекше указшымат ушештарен. Мемнан регионысо правительствын эффективный пашажымат тӱҥ капиталыш инвестицийым пыштыме кугыт гоч аклаш палемденыт. «Тидлан мутым исполнительный кучемын органже-влак кучаш тӱҥалыт. Инвестицийлан да предприниматель-влакын пашаштым вияҥден колтымылан, административный чаракым иземден толмылан поснак кугу вер ойыраш лийыныт. Тачысе кечылан республикыште инвестор-влакым поддержатлыме ныл формо кучылталтеш: финанс, пого, организационный да информационный», – палемден министр.

Минэкономвияҥмаш министерстве квартал еда частный инвестор-влак кӱшеш илышыш шыҥдарыме инвестиций проект реестрым ышта. Тыгак потенциальный инвестор-влаклан темлаш лийше яра площадке-влак реестрат  рашемдалтеш. Д.Пугачевын палемдымыж почеш, икмыняр районышто муниципальный образований администраций ден исполнительный кучемын органже-влак тиде йодышлан кугу верым огыт ойыро. Сандене министр нине задаче-влакым решатлыме шотышто у йӧн-влакым кучылташ да ведомство кокласе кылым саемдаш кӱштен. Мутлан, инвестиций проект-влакым илышыш шыҥдарышашлан проектный управлений приницип-влакым кучылташ да проект команде-влакым ышташ темлен. Тыгак инвестицийым муаш да социально-кӱлешан йодыш-влакым решатлен толмаште кугыжаныш-частный партнерствылан эҥертыман. Ты механизм отрасль-влакым вияҥдымашке бюджет огыл оксам кычалаш йӧным почеш.

 Заседаний годым бизнесын полшымыж дене нӧлталтше инфраструктурын кушмыжымат палемденыт. Мутлан, вашке Марий Эл Правительстве, Стратегический инициативе агентстве, МаРГУ да технологический партнер-влакын тыршымышт дене сентябрьыште университетыште «Точка кипения» коворкинг-рӱдер почылтшаш. Тудо услугым чылт яра пуаш тӱҥалеш.

 Заседенийыште мутланыме йодыш дене икмыянр пунчалым ыштеныт. Регион вуйлатышын кӱштымыж почеш, республикын исполнительный кучем орган, оласе округ ден муниципальный образований вуйлатыше-влак инвестиций пашалан вуйын шогышо посна должностной еҥым палемдышаш улыт. Тудак инвестиций площадке да проект нерген сведенийым чумыраш тӱҥалеш. Тидыжым 10 август марте ыштен шуктыман.  «1 сентябрь марте кугыжаныш-частный патнерство негызеш илышыш шыҥдараш лийше инвестиций проект, тыгак концессионный ойпидыш негызеш нӧлтымӧ объект-влакын переченьышт нерген уверым пуыман», – палемден заседанийым мучашлышжла Александр Евстифеев.

 Марий Эл Правительствын организаций-аналитике виктемжын уверже  негызеш С.Носова ямдылен.

Опубликовать в Одноклассники

Добавить комментарий