КУЛЬТУР ДА ИСКУССТВО

Туризм: “Пеледыш-fest”: канышын чыла чияже»

16 июньышто Йошкар-Оласе Чарла кремльыште кокымшо гана “Пеледыш-fest”: канышын чыла чияже» туризм да каныш фестиваль эртен. 

 Кече мучко тушто республикысе туризм отрасльын чыла гаяк шӧрынжӧ дене палыме лияш йӧн лийын. Икшыве, кугыеҥ-шамычланат  келшен толшо  оҥай программе вучен, вет фестивальыш республикысе тӱрло организаций, учреждений, предприятий ушненыт. Мутлан, гастрономический туризм дене икмыняр кафе ден ресторан, Шернур сыр завод, «МариАйс» хладокомбинат, 1-ше номеран кинде завод да молат палдареныт. Активный туризмым шарыше-влак коклаште «Солдат удачи» парк, тӱрлӧ бойцовский, футбол клуб, «Драйв» мотоцентр да молат лийыныт. Экологий туризмын организацийже-влакат ӧрдыжеш кодын огытыл: тӱрло санаторий, тоштер, «Кугу Какшан» заповедник шке пашашт дене палдареныт. Тыгак Йошкар-Оласе кум вуз, тӱвыра полат, творческий мастерской-влак туристын кумылжым налын кертше программым ончыктеныт. Икманаш, Чарла кремльыште ты кечын чынжымак канышын тӱрло чияжым ужаш йӧн лийын.

Фестивльым Марий Эл правительстве председательын икымше алмаштышыже Михаил Васютин, самырык-влакын политикышт, спорт да туризм министр Лидия Батюкова почыныт. Варажым сценыште концерт, кумылым нӧлтышӧ программе шуйненыт гын, кремльын чыла лукыштыжо фестивальыш ушнышо-влак шкешт дене палдареныт. Тӱрлӧ модыш, конкурс, мастер-класс, кочкыш дегустаций эртаралтыныт. Эсогыл, тазалык шотышто начар еҥ-влаклан ым турист программе денат палдареныт, тыгайже эше республикыште лийынжат огыл.  

 Кумылан-влак Йошкар-Ола дене палдарыше экскурсийышкат ушнен кертыныт.  Оласе историй тоштер пеленысе аланыште  «Царев город» фольклор ушем руш калык муро, куштымаш дене «сийлен», тӱрло калык модыш дене модыктен. Икшыве-шамычлан шкенан республикына, Йошкар-Ола дене палдарыше онай конкурс, викторине эртаралтыныт. Бойцовский клуб-влак тыгак таҥасымашым эртареныт. Кажне модмаште, конкурсышто, таҥасымашыште сеҥыше-влак сай полек дене палемдалтыныт. А изирак ийготан-шамычлан мороженыйымат яра пуэденыт.

Марий кугыжаныш университетын студентше-влакын чолгалыкыштымат палемден кодыман: шкеныштын площадкыштым ыштеныт. Пален нална: 20 июльышто нуно «Кеҥежым университет дене пырля эртаре» проектым угыч илышыш шыҥдараш тӱҥалыт. Тудын дене палдарыше экспозиций, культурно-образовательный программе ончаш толшо-шамычлан поснак келшеныт. МарГУ ойыртемалтше-влаклан сай пӧлекым ямдылен, тиде – ныл енлан каныш кечым эртараш Яльчик ер серыште верланыше «Олимпиец» лагерьыш путёвко. Тудым оласе технологический колледжын студенткыже Эльза Кудрявцева модын налын.

 «Кугу Какшан» заповедникын площадкыжым эсогыл тӱрло ир янлыкын фигурышт дене сӧрастареныт ыле.

Творческий мастер-класслаштат могай-гынат кидпашалан тунемаш йӧн лийын. Мутлан, шун гыч ненчаш, сӱретлаш, оригамим ышташ…

Икманаш, фестиваль эше ик гана ончыктен: мемнан республикыште туризм отрасль утларак сайын вияҥаш тӱналын. Очыни, санденак ӧрдыж кундем гыч толшо турист-влак шукемыт.

 С.Носова. 

 Снимкылаште: фестиваль годым.

Опубликовать в Одноклассники

Добавить комментарий