УВЕР ЙОГЫН

Звенигово районысо марий самырык-влакын форумышт эртен

Кодшо кечылаште Звенигово районысо марий самырык-влакын форумышт лийын. Тудо кокымшо гана эртаралтын. Ты гана ӱдыр-рвезе- влак Ташнур тӱвыра пӧртыштӧ чумыргеныт. 

Мероприятийыш 60 наре еҥ миен. Нуным тӱрлӧ администраций ден отдел вуйлатыше-влак, тыгак Марий Оньыжа Эдуард Александров саламленыт.

Форумын темыже тыгай лийын: «Провой кундем – тенгече, таче, эрла». Программе дене келшышын, ӱдыр-рвезе-влак икмыняр направлений дене мутланеныт, пашам ыштеныт. Тиде – «Пырля пашам ыштен моштымаш», «Звенигово район – Марий Эл республиклан 100 ий темме вашеш», «Марий калыкын историйже, йӱлаже». Тыгак команде дене пашам ыштыме тренинг- модмаш, икмыняр мастер-класс лийыныт. Панельный дискуссийыште форумын кажне участникше эксперт-влаклан йодышым пуэн кертын. Звениговысо краеведений тоштер лӱмынак «Родной край глазами современников» ончерым намиен.

Мероприятий мучаште форумын участникше-влак «Ме пырля улына» мурым тӱшкан йоҥгалтареныт да йыр шогалын марла куштеныт.

Л.Камалетдинова.

Опубликовать в Одноклассники

Добавить комментарий