УВЕР ЙОГЫН

Выпускник-влак, ончыкылык корныда волгыдо лийже!

Шернур районысо школлам тунем лекше-влакын выпускной балышт эртыш.

23 июнь. Уремыште тымык, лӱп-лӱп шокшо. Мардеж укелан кӧра пушеҥгылаште лыштыш-влакат огыт тарване. Тиде кечым Шернур районысо школлам тунем лекше 108 ӱдыр-рвезе чон вургыж вучен, вет нуно, 11 ий парт коклаште шинчыме пагытышт дене чеверласен, кумда илыш корныш вончат. 

16 шагат лишан Шернур посёлкысо рӱдӧ площадьыш изижге-кугужге рӱж погынаш тӱҥальыч. Теве рвезе-влак, ош тувырым, костюмым чиен, салтакла койын шогат. А воктенышт ӱдыр-шамыч чылт йӱксыла ийыт. Чыланат мотор тувырым чиеныт, ӱпыштымат моткоч йытыран келыштареныт. Чурийыштышт куан шыргыжеш, но тыгодымак чоныштышт тургыжланыме шижалтеш. 

Сылне музык йоҥга. Мужыр ден мужыр шогалын, ӱдыр-рвезе-влак туныктышышт дене пырля площадьыш эртышт. Ты кумдык олыкысо тӱрлӧ  пеледыш семынак тӱрлӧ тӱс дене волгалте.

Пайремыште выпускник-влаклан саламлыме да ончыкыжым кумда илыш-корнышто кугу кӱкшытыш шуаш кӱлмо нерген поро шомакым Шернур район администраций вуйлатышын икымше алмаштышыже Александр Кугергин, образований да самырык-влакын пашашт шотышто пӧлка вуйлатыше Лидия Яндимирова, посёлкысо физический культур да спорт рӱдер вуйлатышын алмаштышыже Анна Шкалина, рӱдӧ клуб системым вуйлатыше Валентина Антонова ойлышт.

– Школ дене чеверласыме пайрем кечын выпускник-шамычын ача-аваштым, коча-коваштымат саламлыме шуэш. Лач тиде пагытыште Те икшывыда-влак пелен лийында, полшенда, куан ден ойгым пырля пайленда. Тек нунын сеҥымашышт-влак Тендан илышыштыда ик эн кугу награде лийыт, – Лидия Владимировнан ойлымо тыгай шомакше ача-ава-влакын шинчавӱдыштым лукто.

Выпускник-влакым Марий Эл Кугыжаныш Погын депутат Галина Шабдарова, Юл кундем кугыжаныш технологический университетын ректоржо Виктор Шебашев, Марий кугыжаныш университетын экономике, управлений да финанс институтшын директоржо Татьяна Сарычева, Межрегиональный социальный институтын маркетинг пӧлкажым вуйлатыше Екатерина Марасанова, Республикысе Марий тӱвыра рӱдер вуйлатыше Наталья Пушкина да молат саламлышт да икмыняр выпускниклан Тауштымашан серышым кучыктышт.

«Визытан», мутат уке, парт коклаште шинчыше кажне тунемшын вучымо отметкыже. Но тидлан мыняр тунемаш, тыршаш, пӱжвӱдым йоктараш, йӱд омым кодаш логалеш! Вет сай отметкым налаш манын, йолташ-влак денат модын юарлыме олмеш, книгам кучен шинчаш перна.

Шернур районышто 11 ӱдыр-рвезе школым медаль дене тунем пытарен. Лач нуным саламылымаш — пайремын ик эн куандарыше татше. Шернур администраций вуйлатышын алмаштышыже Александр Кугергин отличник-влаклан медальым, а ача-аваштлан Тауштымашан серышым кучыктыш.

Марисола школым тений 13 ӱдыр-рвезе тунем лекте. Тушечын Андрей Емельяновын, Николай Соловьёвын, Олеся Васееван, Вера Шабдарован аттестатыштышт – «визытан» отметке гына.

– Кызыт ме, выпускник-влак, ындыжым йоча огынал, но але чылт кугыеҥжат огынал. Школым тунем лектын, кумда илыш корныш вончена. Тушто мемнам куанжат, ойгыжат, сеҥымашыжат, сеҥалтмыжат вучат. Тиде жапыште ме мыланна шулдырым пуышо туныктышына-влакым, ача-аванам шарналтена. Кече семын мыланна шокшыдам пӧлеклымыланда тыланда моткоч кугу тау. Таче ме туныктышына-шамыч дене шинчавӱд йӧре чеверласена гын, вес гана куан вашлиймашна куан кумылан лиеш. Тау тыланда, – медалист-влакын лӱмышт дене тауштыш Анна Власова.

Тиддеч вара выпускник-влак ача-аваштлан, туныктышыштлан таум ыштыме семын нуным сылне сем почеш кушташ луктыч.

Тунемме годым икшыве-влак иктышт спортышто сай результатым ончыктат, весышт гуманитар предмет дене кӱкшӧ шинчымашыш шуыт, кумшышт шочмо йылме да калык-влакын тӱвыраштым палымышт дене ойыртемалтыт. Нине тунемше-влак районыштат, республикыштат чолгалыкым ончыктеныт да Российыштат школын чапшым кӱшкӧ нӧлтеныт. Сандене нунат диплом да пӧлек деч посна кодын огытыл.    

Шернур районын выпускной балжын символжо — висвис пеледыш. Кажне школын выпускникше-влак шке пеледышыштым ойырен нальыч да, икте-весе дене кидым кучен, сылне сем почеш куштышт. Нунын деке пайремыш толшо ача-ава, ака-иза, икшыве да ньога-влакат уло кумылын ушнышт. А варажым, ӱдыр-рвезе-влак, шке шонымашыштым каласен, висвис пеледыш тӱсан шарыштым кӱшкӧ, кавашке, колтышт. Нине куштылго шар семын ӱдыр-рвезе-влакынат шонымашашт шукталтышт да тек нунын ыштыме пашашт эреак кӱкшӧ лектышан лиеш. Ончыкылык корныда волгыдо лийже, выпускник-влак!

А.Байкова.

Авторын фотожо.

Опубликовать в Одноклассники

Добавить комментарий