МАРИЙ ЙӰЛА МАРИЙ ТӰНЯ

16 июньышто Йошкар-Олаште Пеледыш пайрем гӱжлен

Гӱжлен манашыже чынжымак келшен толеш. Марий рӱдолан кажне лукыштыжо пайрем мероприятий-влак эртеныт. Тений тудо путырак поян лийын: кажынже чонлан келшышым, кумылым нӧлтышым, шкем тӱрлӧ шӧрын гыч ончыкташ йӧным пуышым ойырен налын, веселитлен кертын. Поро йӱла почеш эртарыме мероприятий-влак дене пырля уат лийыныт. Пӱнчер отышто  Агавайрем кумалтыш, чылан пырля ошкылмаш, «Кудо», «Марий ӱдыр» конкурс-влак, марий  вургемым ончыктымо шоу, чимарий кучедалмаш, Морко районысо «Шуматкече» вокально-инструментальный ансамбльын концертше, ӧрдыж гыч толшо фольклор коллектив-влакын выступленийышт, «Пеледыш FEST фестиваль… Эстоний гыч эсогыл мурышо да куштышо кок коллектив толын ыле. Чылаж нерген возен шукташ куштылгыжак огыл…  

Пеледыш – мурымо да куштымо веле огыл, ожнысек эн ончыч шошо ага тургымым иктешлыше пайрем. Олан рӱдӧ проспектше дене ошкылшо-влак эн ончыч Ленин лӱмеш площадьыш погыненыт. Пайрем лач тушто тӱҥалын. Республикым вуйлатыше, марий ончылъеҥ-шамыч толшо-влакым саламленыт. Марий Эл правительстве председательын икымше алмаштышыже Михаил Васютин регион вуйлатыше А.Евстифеевын саламлымашыжым лудын пуыш. «Кызытсе Пеледыш пайрем пеледыш да шошо ага тургымым мучашлыме пайрем веле огыл, тыгак марий калыкын йӱлажым шуйымо, эртыше да кызытсе илышым ушышо символ. Тудын гочат ме калыкнан пашам йӧратымыжым, поро кумылыжым да мунло улмыжым эскерен кертына», – ойлалтын тушто.

Россий Кугыжаныш Думын депутатше Сергей Казанков саламлышыла, калыкнан, мланде пелен илен, ял озанлык пашам сайын шуктен толмыж нерген кугешнен ойлен, вет киндым ончен куштымо да вольыкым ашныме паша неле гынат, курымашлык. Саламлыме мутым ойлышо-влак коклаште Йошкар-Оласе депутат-влакын погынымаштым вуйлатыше А.Принцев, олан мэрже Е.Маслов, Киров областьысе кугыжаныш кучемын представительже лийыныт.

 «Тиде пайремым мыланна пӱртӱс пуэн», – каласыш саламлыме годым тӱҥ онаеҥ Александр Таныгин. Марий онаеҥ-влакын сценыш тӱшкан лектын шогалмышт да сай тыланымашым ойлымышт кумылымак нӧлталын. Тыштак Александр Таныгынлан «Марий Элысе тӱвыран сулло пашаеҥже» чап лӱмым пуымо нерген удостоверенийым кучыктышт да онышкыжо знакым пижыктышт.

Вара Марий Элын ял озанлык да продовольствий министрже Александр Гречихо республикысе шошо ага тургымым иктешлыме семын пашаште ойыртемалтше-влакым саламлен палемден. Тыге, эн сай муниципал образований  семын У Торьял район ончыко лекын. Эн сай ял озанлык предприятий-влак коклаште икымше, кокымшо, кумшо верыш  У Торьял районысо «1 май», Медведево районысо «Шойбулакский» да «Семеновский» озанлык-влак лектыныт. А теве эн сай механизатор-влак семын Медведево районысо «Семеновский» озанлык гыч С.Н.Рябчиков, «Куженерский» озанлык гыч Н.Г.Фоминых, У Торьял районысо «1 май» озанлык гыч Г.К.Малинин палемдалтыныт. Чынжымак, «Марий калыкна пашамат ыштен мошта, пайремымат чаткан эртара. Тек ила да тӱзлана Пеледыш пайремна! Тек ила да  тӱзлана марий калыкна!» – йоҥгалтыч сцене гыч торжественный ужашым мучашлыше ой-влак.  

 Изирак пайрем концерт деч вара чылан рӱдо каныме паркыш тарванышт. Тушто нуным Марий тӱвыра рӱдерын творческий коллективше, пашаеҥже-влак кинде-шинчал дене вашлийыныт. Каласен кодыман, тений пайрем шествийыш республикысе правительствын, Йошкар-Оласе да районласе муниципал образований, мер организаций-влакын, тыгак республикыште тӱрлӧ национальный тӱвыра автономий-влакын тӱшкашт, марий-влакын тӱшкан илыме ӧрдыж кундемлаж гыч толшо творческий, Эстоний гыч толшо колектив-влак, оласе марий творческий интеллигенций ушненыт. Мӱндыр уна-влак шотыштак мутым шуяш гын, Татарстан, Пошкырт, Одо, Киров, Угарман, Сведловск, Ленинград, Хант-Манси кундемла гыч толшо марий-влак лийыныт.

С.Носова.

Опубликовать в Одноклассники

Добавить комментарий