УВЕР ЙОГЫН

Марий Турек районышто Совет Ушем Геройлан бюстым почыныт

Марий Турек районысо Сардаялыште Совет Ушем Герой Евсей Алексеевич Алексеевлан бюстым почыныт. Тидыже – «Отечествын геройжо-влак» федеральный пректым илышыш шыҥдарыме дене кылдалтын. 

Торжественный мероприятийыште Марий Эл правительстве председательын икымше алмаштышыже Михаил Васютин, республикыште Тӱҥ федеральный инспектор Петр Журавлев, тыгак геройын ӱдыржо-влак Роза Романова ден Светлана Семенова лийыныт.

 Евсей Алексеев Кугу Отечественный сар годым Одесса, Сталинград, Курский Дуга кредалмаште, Украиным, Белоруссийым утарымаште  лийын. Тудо Днепрым форсироватлыме годым поснак ойыртемалтын. Кум немыч минометым, танк ваштареш виктаралтше орудийым, ныл пулеметым да тушманын наблюдательный пунктшым пытарен. Чернигово область Толстолес села воктене тушман войскан икмыняр атакыже ваштареш шоген. А эҥерым вончымо годым немыч танк ваштареш йӧршеш шкетын кодын, но нунымат строй гыч луктын кертын. Фашист-влак чакненыт. Сусыргышо да ушым йомдарыше салтакым кастене веле санитар-влак муыныт.

Днепрын пурла серыштыже талын кредалмыжлан младший сержант Евсей Алексеевлан 1944 ий 15 январьыште СССР Верховный Совет Президиумын указше дене Совет Ушемын геройжо чап лӱмым пуэныт. Е.А.Алексев Берлин марте шуын, рейхстагым налмаште участвоватлен. Сар мучашлалтмеке, шочмо ялышкыже пӧртылын. Теве ынде Сардаялыште тудын дене палдарыше шарныктыш ышталтын.

 С.Носова.

Опубликовать в Одноклассники

Добавить комментарий