УВЕР ЙОГЫН

Марий Эл ден Венгрий вашкылым утларак пеҥгыдемдынешт

Кушкыжмын Марий Эл вуйлатыше Александр Евстифеев Казаньыште Венгрийын генеральный консулжо Адам Штифтер дене вашлие. 

Вашлиймаш ойыртемалтшын, … игече нерген мутланымаш гыч тӱҥале. Умбакыжат тудо тыматле шӱлыш дене эртыш. Александр Евстифеев ден Адам Штифтер Марий Эл Республик ден Венгр Республик коклаште ятыр йодыш шотышто пайдале вашкылым ыштышаш нерген мутланышт. Консул ончыкыжым ялозанлык, образований, тӱвыра шотышто пашам пырля шуктышаш нерген поснак палемден кодыш.

– Финн-угор-влаклан финн-угор мландыште лияш эреак куанле. Марий Эл – мыланна кӱлешан регион. Мемнан икгайлыкна шуко, тӱвырана икте. Тӱвыра кылым вияҥдыме шотышто ме тиде ийын, очыни, кеҥежымак республикыште венгр кинофестивальым эртарена. Ныл кече жапыште ныл фильм ончыкталтеш. Фестивальым эртарыме шотышто кугурак ужаш йодышыжым ме шке ӱмбакына налына, – мане Адам Штифтер.

 Александр Евстифеев тиде шонымашым сайлан шотлыш да тыгай сынан мероприятийым эртарыме Йошкар-Олашке шуко туристым толаш кумылаҥда манын палемдыш. Тыгодымак тудо мемнан дене гостиничный бизнесым вияҥдаш, унагудым утларак чоҥаш кӱлеш манын каласыш.

Венгрий ден Марий Эл кокласе вашкыл нерген республик вуйлатыше тыге палемдыш:

– Тӱвыра сферыште кылна сай да келшен толшо. Науко ден образовательный сферылаштат тудо моткоч кӱлешан. Экономике шотышто вашкылат саяк. Но тачысе кечылан тиде гына шагал.

Сандене эше мом ышташ лийме нерген Александр Евстифеев ден Адам Штифтер кужунак мутланышт. Тыгак тӱрлӧ мероприятийыш толаш  икте-весыштым ӱжыч. Мутлан, Венгрийыште тӱнямбал сонар выставке лийшаш.

– Мыят сонарзе улам. Но пытартыш жапыште утларак фотоаппарат дене  «лӱйкалаш» йӧратем, – палемдыш республик вуйлатыше.

Вашлиймаш мучаште Александр Евстифеев консуллан сӱрет семын келыштарыме марий тӱрым пӧлеклыш. Тудат «меат ямдылалтынна» мане да вашеш пӧлекым кучыктыш.

Кушкыжмын Йошкар-Олаште лиймыж жапыште Казаньыште Венгрийын генеральный консулжо тӱвыра объектлам ончен савырнен, Марий кугыжаныш университетын студентше-шамыч дене, тыгак республикын агропромышленный предприятийже-влакын вуйлатышышт дене вашлийын.

Любовь Камалетдинова.

Опубликовать в Одноклассники

Добавить комментарий