УВЕР ЙОГЫН

Евстифеев Йошкар-Ола мучко инспекций дене коштын савырнен

Марий Эл вуйлатыше Александр Евстифеев Йошкар-Ола мучко инспекций дене коштын савырнен. Тиде гана чоҥымо пашалан ойырымо мланде участке-влакым ончен лектын. 

Тудын дене пырля верлашке олан мэрже Евгений Масловат миен.

Строитель уремыште Марково шӱгарла воктенысе автодромышто машинам виктараш тунемше-влак кокла гыч шукынжо лийыныт. Кызыт тушто асфальт чот локтылалтше, разметке уке, чарак олмеш пыштыме орава покрышке-влак кышкылт пытарыме семын кият. Тыгай сӱретым ужмеке, Александр Евстифеев Евгений Масловлан каласен:

– Ола кумдыкышто ик гектар мланде – кудалтен кодымо да шотыш кондыдымо. Тыгай «полигонышто» водитель-шамычым кузе сайын ямдылаш лиеш? Автоинспекций пашаеҥ-влак тыште чӱчкыдын лиедат? Ончалза, аварий лийме шотышто сӱрет мемнан дене ӱмаште могай ыле. Теният тудо сайжак  огыл.

Олан мэржылан республик вуйлатыше эн ончычак автодром верланыме кумдыкын статусшым палемдаш, вара кугыжаныш автоинспекций дене кылым ышташ кӱлмӧ нерген ойлен.

– Порядкым ыштыман. Тыште тунеммеке, ончыкыжым лӱдыкшыдымын кудалышташ тӱҥалыт манын еҥ-влак палышаш улыт, – каласен Александр Евстифеев да кеҥеж мучаш марте чылажымат шотыш конден шукташ кӱштен.

Мийыме вес вер «Молодежный» микрорайон лийын. Тыште оласе писын чоҥалтше икмыняр микрорайоным – Спортивныйым, Мирныйым да Восточныйым – тӱзаташ кӱлмӧ нерген мутланеныт.

Лишыл жапыште Йошкар-Ола гыч Шернур кугорно дене лекмаште «Кинде-шинчал» скульптур композиций (калыкыште тудым «Женщина с караваем» семын палат) кумдыкышто спортивный сынан у парк почылтшаш.

– Воктенысе микрорайонлаште илыше да ончыкыжым илаш тӱҥалше-влаклан уремысе спорт да физкультур дене заниматлаш нимогай йӧн уке. Еҥ-шамычлан каналтен кошташ, велосипед дене кудалышташ, ече дене мунчалташ нигушто. Тыште кугу кумдык мланде пӧрт-влакым чоҥаш келшыше статусан огыл. Сандене тудо канышлан да спортлан ойыралтшаш, – каласен  Марий Эл вуйлатыше.

Тыге Водопроводный урем ден Изи Какшан сер кокласе 20 гектар кумдыкым тӱзаташ тӱҥалыт. Модмо вер, йоча площадке, куржталаш, кеҥежым велосипед дене кудалышташ, телым ече дене кошташ посна корным ыштышаш нерген концепций лишыл кок арня наре жапыште ышталтшаш.

– Социальный объект-влак деч посна шуко илыме верым чоҥышо господа-шамычымат тиде кугу кумдыкым тӱзатыме, каныме паркым чоҥымо пашашке ушыман. Вет инфраструктурым ыштымеке, воктенысе микрорайонлаште чоҥымо пачер-влакын акышт кушкеш, – олан мэржылан кӱштен каласен Александр Евстифеев.

Л.Камалетдинова.    

Опубликовать в Одноклассники

Добавить комментарий