РУБРИКИ

Туризм: Озакъял шеҥгелне ик сылне вер уло…

Кодшо ий кеҥежым Марий Элыште эртыше «Время возможностей» икымше межрегиональный экономике форумышто предприниматель Вадим Агафонов «ЗаАзьяково» экопаркым ыштыме проектше дене палдарен.  Теве ынде июнь тӱҥалтыште тудын шонымашыже шукталтын: экопарк почылтын. Но шонымашым илышыш тӱрыс пуртен шуктымешке эше шуко пӱжвӱдым йоктарыман. Экопарк Медведево районысо Кыдал Озакьялыште верланен. Тушко миен савырнеда гын, умыледа: але марте мемнан регионышто тыгай озанлык лийын огыл.  

Мо тыгай экопарк? Чылажат кок ий ончыч тӱҥалын. Тидлан Озакъял шеҥгелне 100 утла наре гектар мландым налыныт да тудым тӱзаташ пижыныт. Агафоновын Йошкар-Олаште шкенжын ресторанже уло. Тушко толшо-влакым экологически яндар продукт дене сийлаш манын, эре нелылык лектын. Санденак шылым, пакчасаскам, емыжым шкенан денак ыштымым налаш манын, тыгай озанлыкым почаш шонымаш лектын. А тидлан тыште тӱрлӧ урлык ушкалым, сӧснам, кроликым, сурт-кайыкым, мӱкшым ашнаш, пакча-саскам, емыжым ончен кушташ тӱҥалыныт.

Кеҥеж пагытыште эко, агротуризм дене кылдалтше обьект-влакымат почыт. Южышт пашамат ыштат. Мутлан, верысе пӱям эрыктен шындымеке,  тушто турист да тыглай канаш толшо-влаклан жапым веселан да пайдалын эртараш йӧн ышталтын. Икмыняр кӱвар, йӱштылаш, пляж волейболла, футболла модаш, канен шинчаш вер, тӱзатыме сер, беседке, изи пӧрт, шатер-влак улыт. Тенийсе кенежлан тыште йуштылаш келштыарыме вейк-парк манмым почнешт. Тудым пӱяштак нӧлтен шынденыт. Кеҥежымсе террасе, кафе – чылажат жапым сайын эртараш ышталтын.

Экопарк кум ужашлан шелалтеш: агротуризм, рекреационный зоно да  фермер комплекс. Мо ӧрыктарыш: тошкен коштмо мландым чыла вере газон дене тӱзатен толыт, кумдыклам ланшафт дизайнлан келыштарат. Чыла оралтыш асфальтым, шаргӱм, шанчашым оптымо корныла дене кошташ лиеш.

Экопаркым почмым Вадим Агафоновын 50 ияш лӱмгечыжлан келыштареныт. Тушко  республикын ялозанлык да продовольствий министрже Александр Гречихо, самырык-влакын политикышт, спорт да туризм министр Лидия Батюкова да моло официальный еҥ-влак миеныт. Ончыч «ЗаАзьяково» экопаркыш пурымаште стеллым почыныт, йошкар тасмам пӱчкыныт. А вара чылаштым, автобусыш шынден, паркын рӱдышкыжӧ наҥгаеныт, экскурсийым эртареныт. Тудын деч вара презентацийыш мийыше-влаклан  парк кумдыкышто ончен куштымо продукций дене ямдылыме шокшо кочкыш дегустаций эртен.

Пайремыш толшо-влакым эше ик сюрприз вучен. Вес ийын тыште сырым шолтымо предприятийым пашаш колташ палемдалтын. Тудлан негызым пыштымаш эртыш. Икымше менгым Вадим Агафонов шкежак шогалтыш.  

 Йӱран игече лийын гынат, пайрем программе кӱрылтын огыл. Йоча-влакымат модыктеныт, тӱрлӧ конкурс, шуко пӧлек дене кумылыштым нӧлтеныт. Кугыеҥ-влаклан ландшафт дизайн,  тыгак ушкалым лӱштымӧ шотышто мастер-класс-влакым эртареныт. Концерт программат поян лийын.

 Самырык-влакын политикышт, спорт да туризм министр Лидия Батюкован ойлымыж почеш, тыгай паркым ыштымаш мемнан кундемысе туризм отрасльымат вияҥдаш, толшо турист чотымат кугемдаш полшышаш. Вет агро, этнотуризм мемнан регионлан ик эн тӱҥ направленийлан шотлалтеш. Тушто йоча да кугыеҥ-влакланат экскурсийым эртараш тӱҥалыт. Самырык мужыр-влак кызытат тушко сӱаным эртараш чӱчкыдын толыт. Ончылгоч палемдыме почеш, проектым тӱрыс шыҥдараш 100 миллион наре теҥге кӱлеш.

Светлана Носова. 
 М.Скобелевын фотожо.

Опубликовать в Одноклассники

Добавить комментарий