КУЛЬТУР ДА ИСКУССТВО ТЕАТР

Нина Голованова: «Балерина лияш шоненам, но курчак дене модаш оҥайрак»

Ӱмыр мучко манме гай ик вере пашам ыштыше-влак республикыштына моткоч шуэн вашлиялтыт. А теве лаштыкнан тачысе унаже Марий Элын калык артистше Нина ГОЛОВАНОВА 40 ий Республикысе курчак театрыште тырша.  Тылзе ончыч тудо 60 ийым вачӱмбакше пыштен гынат, кызытат тӱрлӧ роль дене йоча-шамычым веле огыл, кугурак-влакымат куандара, шортара, илыш нерген шонаш тарата.

Нина Ильинична У Торъял районысо Шуҥго ялеш шочын-кушкын. У Торъял посёлкысо интернат-школым, а варажым культпросветучилищым тунем лектын.

Ялысе ӱдыр изиж годым кӧ лияш шонен?  Курчак театрыш тудо кузе логалын? Нине да моло йодышлан вашмутым, шкеж дене мутланымеке, пален налына.

– Изи годым кажне йоча артист лияш шонен кушкеш. Теат тыгак, очыни?

– Мый тыглай ешыште шочын-кушкынам, авам ден ачам верысе колхозын пашаеҥже лийыныт. Мемнан ялыште школ лийын огыл, сандене посёлкысо школ-интернатыште тунемынам. Туныктышына-влак моткоч пеҥгыдын йодшо лийыныт, сандене чылажымат жапыштыже шукташ кӱлын. Тидыже варажым илышыште пеш полшен. Парт коклаште шинчыме пагытыште балерине лияш шоненам. Мӧҥгӧ икымше гана телевизорым кондымекышт, эн ончычак балетым ужынам да моткоч тӱткын эскеренам.

– Сандене школ-интернат деч вара вигак культпросветучилищыш тунемаш пуренда?

– Уке, авам ден ачам туныктышылан але врачлан тунемаш каяш ойлымышт деч вара документым пединститутыш пуэнам ыле. Но икана, интернатысе воспитетелем Галина Васильевна Курбатовам ужмеке, тудо артистлан тунемаш каяш темлен. Пединститут гыч чыла документем налын, культпросветучилищысе режиссёр отделенийыш тунемаш пуренам. Тудым пытарымеке, самодеятельностьыш режиссёр семын, тыгак курчак театрыш артистлан каен кертынам. Мутат уке, кокымшыжо мылам лишылрак лийын, олаште илымем да артистлан пашам ыштымем шуын.

– Курчак дене модаш куштылгыжак огыл, маныт. Тыландат тӱҥалтыште неле лийын докан?

– Тунам марий спектакль-влакым моткоч шуко шындыме. Тӱҥалтыште курчак дене модаш, кидыште кучаш нелын чучын, но тидым ончыкташ тыршен омыл, чытенам. Икмыняр жап гыч пий семын опташат, агытан семын кекереклашат тунем шумо.  Икымше спектаклем «Очень умные игрушки» лийын. Тушто мый изи рвезе Ростикын рольжым модынам. Сценарий почеш самокат дене кудалыштынам да камвозынам. Тиддеч вара пулвуем кандалген, но садак артист паша оҥайын чучын.

– Чылаже мыняр спектакльыште модмыдам шотлен огыдал?

– «Морозко», «Гусёнок», «Дикие лебеди», «Ай да Мыцык», «Сельские женихи» да шуко-шуко молат.  Кызыт шотлымашем уке, иктаж шӱдӧ утла погына, шонем. Нылле ий жапыште Кугыжан ӱдырат, Золушкат, Агытанат, Вуверкуват да молат лияш логылын. Мыняр ролем уло — кажныже мылам шерге, вет кажныжым уло чоным пыштен чоҥымо, авторын ойжым южгунам шомак деч посна залыште шинчыше чукай-влак деке намиен шукташ кӱлеш.

  Кумданрак — «Марий Эл» газетын
2018 ий 5 июньышто лекше номерыштыже лудын кертыда.

Алевтина Байкова мутланен.

Опубликовать в Одноклассники

Добавить комментарий