УВЕР ЙОГЫН

Марий Элысе онкодиспансерын регистратурыштыжо электрон черетым ыштеныт

Республикысе онкодиспансерын регистратурыштыжо электрон черетым ыштеныт. 

Ынде эмлымверыш толшо пациент холлыш вераҥдыме терминал гыч талоным налеш да черетшым вучаш тӱҥалеш. Тудын лишеммыжым йӱкан системе увертара, да пациент регистратурын палемдыме окнашкыже мия. Тӱҥ электрон табло черетын ончыко кайымыжым ончыкта, сандене кудо окнаште могай «номерым» обслуживатлымым холлышто эскераш лиеш.

Электрон черетым ыштыме дене пациент-влаклан, докторын приёмышкыжо талоным налаш але возалташ манын, регистратур ончылно шӱкедылын-ишыктылын шогыман огыл. Иктешленрак каласаш гын, онкодиспансерыште ынде ончычсо гай регистратур уке. Тыште регистратор-влакын паша верыштым – ныл кабинкым – холлыш лукмо. Регистраторланат, черлын картычкыжым кычалын, жапым йомдарышаш уке: диспансерыш икымше гана толшылан электрон картычкым почеш, а ончылгоч возалтше пациентын кагаз картычкыжым врачын кабинетышкыже приём марте намиен пышта.

М.ИВАНОВА.

Опубликовать в Одноклассники

Добавить комментарий