ТЕАТР

Шарнымаш кас: «Айдеме чон – кавасе шӱдыр»

Тыге маналтеш журналист, поэт, мер пашаеҥ, М.Шкетан лӱмеш Марий национальный драме театрын чон йӱлен пашам ыштыше ончычсо директоржо Юрий Петрович Русановын шочмыжлан 50 ий теммылан пӧлеклалтше книгаже. 

Книгаште поэзийжым, журналист пашажым уэш лудын лекташ, тыгак тудын нерген пашам пырля ыштыше, йолташыже-влакын, родо-тукымжын чон гыч лекше шарнымашыштым шергалаш, тӱрлӧ жапыште ыштыме фотокартычкыже-шамычым ончаш  лиеш.

– Ятыр ий ик леведыш йымалне кок кугу коллектив иленна, пашам ыштенна. Тӱрлӧ нелылык мемнам тургыжландарен гынат, Шкетан лӱмеш марий национальный драме театрын вуйлатышыже Юрий Петрович Русанов дене нигунамат шурген огынал — чылажымат пырля каҥашен, ик ойыш шуынна. Шке пашажым чон йӱлен ыштыше директор мер пашаштат эреак чолгалыкым ончыктен, поро ой-каҥаш дене полшен, тудын деч нигунамат «уке» шомак шоктен огыл, – палемден книган презентацийже годым тӱвыра, печать да калык-влакын пашашт шотышто министр Константин Иванов. – Чын, тудын уке лиймыже – уло калыклан кугу йомдарымаш. Шке кӱчык ӱмырыштыжӧ театр искусствым вияҥдымашке кугу надырым пыштен, сандене ме, тудын ушан-шотан шомакшым шарналтен, пашанам ончыко виктарен колтышаш улына да йолташна Юрий Петровичым эреак шарнаш тӱҥалына.

Ю.Русановым шарныме лӱмеш концерт программыште Юрий Петровичын уло илыш-корныжо ончыкталте. Зал калык дене пырля тудын ача-аваже, эн весела самырык студент пагытше, икымше йӧратымашыже, мер пашаже, ойыртемалтше журналистике йылмыже, йӧратыме пелашыже, шочшыжо-влак нерген келгынрак пален нална. Концерт сценарийым Ю.Русановын пошкудыжо, йолташыже, Марий Элын сулло артистше Александр Бирюков поэт Лидия Иксанован Юрий Русанов лӱмеш возымо «Йӧратымаш каваш чӱкталтше…»  поэмыж негызеш ямдылен. Чон ойгана, кумыл тодылалтеш, логарыш комыля кӱза. Вет Юрий Русановынат поэзийже тыгаяк шӱлышан: философский,  келге содержаниян, шонаш таратыше. Колыштат да, уло кӧргым удырен, шинчавӱд лектеш, а могыр, йӱштӧ вӱдым опталмыла, копы-ыж лийын кая. Тыгаяк ыльыч концертыште Марий Элын калык артистше Светлана Строганован, Марий Эл культурын сулло пашаеҥже, мурызо Татьяна Денисован, Марий Элын сулло артистше Роман Алексеевын, театрын самырык артистше Иван Соловьёвын йоҥгалтарыме мурышт.

– Юрий Петровичын шомакше келге, сандене семым возаш куштылго. Тудын дене ме эреак икте-весым вашке умылен иленна. Чылаже тудын возымо иктаж вич почеламутшылан семым возенам, – палемдыш Россий искусствын сулло деятельже, композитор Иван Егоров.

– Юра эре пеленна. Тидын шотышто тудо палымат пуа. Но моткоч чаманем, мый тудым шыман ӧндалын, шупшалын ом сеҥе, – ойла Юрий Петровичын Нина пелашыже. – Чонем чот коршта, ойгыра. Тидын нерген поэт Лидия Геннадьевна Иксановалан кутыренам ыле. Ик жап гыч тудо «Мый ӱшанем, пырля ме лийына» почеламутым шочыктыш.

Тиде муро дене шарнымаш касыште Светлана Строганова уло калыкым ӧрыктарыш.

– Алян мурыжо уло, тудым чылан палат. А тиде тек Нинан лиеш, – мане тудо.

У мурым С.Строганова композитор Иван Егоровын рояльым шоктымыж почеш йоҥгалтарыш.

Ласкан, поро шӱлыш дене шарнымаш кас эртыш. Вет Юрий Петрович шкежат тугаяк кумылан лийын. Ме тыйым пагален шарнена. Тый эре шӱмыштына улат, Юрий Петрович.

А.Байкова.

Опубликовать в Одноклассники

Добавить комментарий