КУЛЬТУР ДА ИСКУССТВО ФОЛЬКЛОР

Тӱвыра илыш: Еш йӱлам чапландареныт

19 майыште У Торъял поселко ик жаплан ятыр-ятыр еҥын пырля чумыргымо да веселан мурен куштымо верышкыже савырнен – ты кечын тыште еш тукым фольклор ансамбль-влакын «Творцы и хранители» черетан фестивальышт эртен. 

Але марте вич ий тушко республикысе районла-влак гына ушнат ыле гын, тений икымше гана тудо межрегиональный фестиваль кӱкшытышкӧ лектын. Санденак ты гана Марий Эл гыч 13 район да Козьмодемьянск ола гыч веле огыл еш коллектив ден еш фольклор ансамбль-влак чумыргеныт, тыгак Татарстан, Удмуртий, Башкортостан, Чуваш Республикла гычат толшо-влак лийыныт. Чылаже 270 утла участник усталык ден мастарлыкым ончыктен.

Моло ийласе семынак теният фестивальыш ушнышо-влакын пашаштым ныл номинацийыште акленыт. I-ше степенян лауреат лӱм дене палемдалтыныт:

  • «Эн сай фольклор ансамбль» номинацийыште – Звенигово район гыч (Ташнур СДК, вуйлатыше А.Дружинин) Дружининмыт еш;
  • «Декоративно-прикладной творчествыште эн сай династий» номинацийыште – Леденейкинмыт еш (Козьмодемьянскысе культурно-исторический тоштер комплекс, вуйлатыше Н.Леденейкин);
  • «Детки и предки» эн сай фотовыставке» номинацийыште – Шернур район гыч Масалыкинмыт еш (Шернур РЦДК, вуйлатыше А.Швецова);
  • «Эн сай национальный кухньо» номинацийыште – Звенигово район гыч (Ташнур СДК, вуйлатыше А.Дружинин) Дружининмыт еш.

Тидын дене пырля тыгак кажне номинацийыште еш ден коллектив-влакым посна диплом дене палемденыт.

Жюрин иктешлымашыж почеш, тений фестивальын гран-прижым Чуваш Республик гыч «Камал» еш ансамбльлан (вуйлатыше Д.Кудряшова) кучыктеныт.

Л.Камалетдинова.

Опубликовать в Одноклассники

Добавить комментарий