КРАЕВЕДЕНИЙ

Тӱрлӧ тӱсан Марий Эл:  Ме чылан Российыште илена, сандене руш улына…

Пытартыш перепись почеш Российыште 193 тӱрлӧ калык ила. Шке жапыштыже Андрей Платонов возен: «Мый дечем посна калыкна тичмаш огыл». Тыгак Россият кажне посна калыкше дене шерге. Ятыр курымла дене тӱрлӧ калык элнан ик пырля историйжым ышта, ваш келшен, полшен ила. Кажныже шке йӱлажым, тӱвыражым арален толеш да вияҥда. Лач тыге Шочмо элна ойыртемалтше да ӧрыктарыше сыным налеш, манаш гын йоҥылыш огына лий, очыни. 

 Марий Элат – кугу Российын изи ужашыже. Тыштат чыла тыгак. Марий, руш, татар, чуваш, армян, грузин, украин да моло калык илат гынат, ме садак пырляже руш калык улына. Санденак кажне калыкын йӱла ден тӱвыраште, кочкышышто шуко икгайлыкым муаш лиеш. Теве тыгайрак шонымашым луктын каласыш «Калыксий» фестивальын руш кухньыжын презентацийыштыже Российысе марий-влакын федерал калыкле-тӱвыра автономийыштым вуйлатыше Лариса Яковлева.

 Руш кухньо презентаций Йошкар-Оласе «Тёплая речка» рестораныште эртен. Тушко фестивальыш ушнышо тӱрлӧ калыкын общиныштын еҥже-влак толыныт ыле. Республикысе Руш тӱвыра рӱдерын еҥже-влак руш калык тӱвыра, йӱла, кочкыш дене палдарыше оҥай программым ямдыленыт. «Царев город» руш фольклор ансамбльын участникше-влак тыште полшышт.  

 Руш калык тӱвыра дене кажныже палыме улына, вет ме Российыште илена. Традиционный кочкышат палыме: ковышта шӱр, окрошко, тӱрлӧ когыльо, холодец, кӱктымо шыл… Теве мо дене сийлышт руш кухньо презентацийыште. Эшежым ты рестораныште марий национальный кочкышымат ямдылат. Турист-влаклан поснак тӱрлӧ кайыквусо, ир янлык шыл дене ыштыме кочкыш келша, ойлышт. Ӧрыктарыш мелна гыч ыштыме икмыняр лончан когыльо. А кажне лончо кӧргыжлан пакчасаскам кучылтмо. 

 Сийлыме кокла гычак фестивальын участникше-влак келшымаш нерген шуко кутырышт. Чынжымак, ты фестиваль ик ӱстел йыр армян, азербайджан, грузин, осетин, еврей, татар, украин, руш, одо да марий-влакым чумырен. Кажне касыште пырля муреныт, куштеныт, мутланеныт. Икте весын йӱлаж дене палыме лийыныт да шуко икгайлыкым муыныт. А пайрем ӱстембалне команмелна, хашлама, сациви, долма, перепеч, фаршмак, осетин когыльо, борщ да шуко моло кочкыш лийын. Вет сай кочкыш кажне еҥлан порырак лияш полша. А кушто порылык, тушто ике-весым умылымаш озалана. Фестиваль организатор-влаклан шукынжо тауштеныт. А эртарен тудым Марий Элын Тӱвыра, печать да калык-влакын пашашт шотышто министерствыжын полшымыж дене Марий тӱвыра рӱдер да Российысе марий-влакын федерал калыкле тӱвыра автономийышт.  

 С.Носова
Снимкыште: «Царев город» фольклор ансамбльын участникше-влак.
Авторын фотожо.

Опубликовать в Одноклассники

Добавить комментарий