КАЛАСЕ, "МАРИЙ ЭЛ"

Йодыш-вашмут: Шинчалыкым налынам…

Кевытыште кече деч аралалтме диоптрийдыме шинчалыкым налынам. Налмем годым тудо мылам келшен. Но мӧҥгыштӧ умылышым: оправыже чурий сыным локтылеш. Сандене тудым вес оправе дене вашталташ шонен пыштышым. Но кевытыште мыйын йодмем шукташ тореш лийыныт. Сатучо мылам умылтарыш, пуйто шинчалыкын линзыже продовольственный огыл сату радамыш пура. А закон почеш, тӱрлӧ кугытан, форман, габаритан, фасонан але комплектациян сай качестван тыгай сатум вашталташ але пӧртылташ ок лий. Мыйын шонымаште йодмо почеш ыштыме диоптриян линзым гына вашталташ ок лий, а мыйже тыглайым гына налынамыс. Сатучо чын ыштен мо?

Н.Васильева.
Йошкар-Ола.

Йодышлан Роспортебнадзорын Марий Элысе Управленийжын пресс- службыштыжо вашештеныт:

 – Тӱрлӧ кугытан, форман, габаритан, фасонан, тӱсан але комплектациян сай качестван вашталташ але пӧртылташ лийдыме кочкыш огыл сату радамыште (РФ Правительствын 1998 ий 19 январь ыште лекше пунчал почеш) тыгай пункт уло: тушто «шинчалык линзе» манын ончыктымо. Но тиде умылымаш черым мӧҥгысӧ условийыште эмлаш да профилактикым эртараш гына келшен толеш. Тендан шинчалык, диоптрий деч посна, ойлымыда почеш, лачшымак декоративный амал дене гына кучылталтеш. Сандене сатучо законлан тореш ошкылым ыштен.  «Потребитель-влакын праваштым аралыме нерген» законын 25-ше статьяж дене келшышын, те келшен толдымо сатум 14 кече жапыште вашталтен кертыда. Налме сату дене пайдаланен огыдал, товарный сынже, портебительский ойыртемже, пломбыжо, фабрикын ярлыкше аралалт кодыныт да товарный чек але тудым тӱлен налмым пеҥгыдемдыше вес документ уло гын, продовольственный огыл сатум  вашталтышаш улыт.

Товарный але кассе чек-влак уке улыт гын, те свидетель-влакын показанийыштлан эҥертен кертыда.

С.Носова

Опубликовать в Одноклассники

Добавить комментарий