КУЛЬТУР ДА ИСКУССТВО

Калык усталык: «Каскад» театр мастарлыкым терген

16 гыч 21 апрельыште Йошкар-Олаште драматический коллектив-влакын «Каскад» фестиваль-лабораторийышт эртен. Тушко Киров, Йошкар-Ола да республикысе 12 район гыч 17 коллектив ушнен. Фестивальыш участник-влак турлӧ жанр дене ойыртемалтше да шкешотан пашаштым аклаш луктыныт. Нуно илышын тӱрлӧ йыжыҥже дене кылдалтше темым тарватеныт.  

Мутлан, Морко калык театр А.Волковын «Кунам ломбо пеледеш» пьесыж почеш спектакльым ончыктен. Пьесе 1969 ийыште возалтын гынат, тудын содержанийже тачысе илышланат келшен толеш. Постановкышто ялыште паша вер укелык, изи пашадар да тулеч моло йодышым тарватыме. Артист-влак палемдыме образышке пурен моштымышт дене ойыртемалтыныт. Сценымат ты коллектив моторын сӧрастарен.

Тиде районынак Чодыраял культур пӧрт пеленсе «Пулдырчо» театр коллектив «Кузе илет, ялем?» (Елена Семёнова) мыскара сынан постановко дене куандарыш. Спектакль тачысе илышлан келшен толеш, вет пытартыш жапыште ялысе пӧръеҥ-влак шукынжо, ешым коден, кугу оксам кычалын, ӧрдыж кундемыш лектын каят. Тидлан кӧра вате-марий коклаште сырымаш, умылыдымаш да молат лектыт.

А Оршанке посёлко гыч Н.Лузгинов лӱмеш руш драме калык театр А.Островскийын «Доходное место» пьесыж почеш постановкым ончаш темлен. Спектакльыште утларакше пӧръеҥ-влак модыныт.

– Тиде пьесым мемнан коллективлан туныктышына, режиссёрна Николай Лузгинов пуэн коден. Илымыж годым тиде спектакльым шындаш шонен ыле. А кызыт, тудын пашажым ме шуена, сандене туныктышынам шарнен, тиде пашам аклаш луктынна, – палемден театр коллектив вуйлатыше Алевтина Падерова.

Калык театр коллектив-влакын мастарлыкыштым жюри аклен.

Фестивльын гран-прижым «Мечта» тӱвыра да каныме рӱдерын (Звенигово) «Провинциалы» лӱман калык театрже сеҥен налын.

А икымше степенян лауреат лӱм дене Морко (А.Волков «Кунам ломбо пеледеш»), Оршанкысе Н.Лузгинов лӱмеш руш драме (А.Островский «Доходное место»), тыгак Киров гыч «Зурбаган» книга (Н.Гоголь «Женитьба») калык театр-влак палемдалтыныт.

Кокымшо степенян лауреат лӱмым «В старом доме» (Йошкар-Ола), «Воштончыш» (Кужэҥер район), а кумшым Арбан (Медведево район), Мариец посёлкысо (Марий Турек район), «Пулдырчо» (Морко район) калык театр-влак налыныт.

Алевтина Байкова

Опубликовать в Одноклассники

Добавить комментарий