МАРИЙ ТӰНЯ МЕР ИЛЫШ

Марий талешке кече: Чылажат Марий талешке-влак лӱмеш!

Марий талешке кече Йошкар-Олаште молгунамсе семынак «Шарнымаш сорта» акций дене тӱҥалын. Талешкына-влакын шарныктышышт воктеке миен, вуйым савыме, нунылан туаштен, пеледыш аршашым пыштыме. Куанен каласыман, тений акцийыш республикысе чыла гаяк марий мер организаций, землячество-влакын еҥышт, тӱвыра, мер пашаеҥ, журналист-шамыч ушненыт. Ончыч чылан С.Г.Чавайнын чапкӱжӧ воктене погыненыт гын, вара моло лӱмлӧ марий-влакын шарныктышышт воктеке пеледышым пыштеныт. Мутлан, журналист-влак «Марий Эл» газетын ончычсо тӱҥ редакторжо Петр Корниловын илыме пӧрт пырдыжыште кечыше шарнымаш оҥаж воктеке миеныт.

А вара чылан В.М.Васильев лӱмеш Йылмым, сылнумытым да историйым научно-шымлыше марий институт воктеке погыненыт. Тудын пырдыжыште лӱмлӧ шанчыеҥлан да талешкылан чап оҥам почыныт.

Марий калыкна тудын суапле пашажым эреак шарна. «Йылме уло – калык уло» ойжак мом шога! Ме тудым икымше марий шанчызе, лингвист, этнограф, фольклорист, краевед, просветитель, мер пашаеҥ, писатель семын (Ӱпымарий псевдоним дене серен) палена. Лӱмжӧ классик-влак С.Чавайн, М.Шкетан, Н.Мухин, Н.Игнатьев, Шабдар Осып семынак историеш возалт кодын. Тыгак журналист, композитор, туныктышо, тоштер пашаеҥ, кусарыше семынат тыршен. Валериан Михайловичым «марий языкознанийын патриархше» семын амал деч посна огыт ман. Ончыктымо чыла сферым авалтыше 200 наре пашам возен. Эсогыл йоча-влаклан почеламутым, басньым серен. Чумыр пашажланак 1957 ийыште тудлан, диссертацийым аралыде, филологий науко доктор званийым пуэныт. Марий йылме дене икымше науко доктор лийын. Чыла пашаже марий калыкын уш-акылжым пойдарымашке виктаралтын. Шкежат лу йылмым пален. Финляндийын науко академийже пеленсе Финн-угор обществын почётан членже лийын.

Таче лӱмжым Йылмым, сылнумутым да историйым научно-шымлыше марий институт нумалеш. Талешке кечын чап оҥамат почыч. Тидым икмыняр ий ончычак ышташ палемдыме улмаш.

Шарныктышым Марий Эл правительстве председательын икымше алмашыштыже М.Васютин да институт директор Е.Кузьмин почыныт. Куан татым пайлаш В.М.Васильевын шочмо Пошкырт кундемже гыч Мер Каҥашын еҥже А.Гайсин да республикыште эрвел марий-влакым ушышо «Ош Виче» землячествын еҥже-влак толыныт ыле. Лӱмлӧ ученыйын шочмо верыштыже верысе калыкын вийже дене икмыняр ий ончыч тудын лӱмеш тоштерым, тыгак бюстым шогалтеныт. Нуно шке землякышт дене моткоч кугешенат, Талешке кечын шарныктышым почмылан туаштат.

Марий талешке кече дене саламлымаш шомакым марий оньыжа Э.Александров, Марий Элын тӱвыра, печать да калык-влакын пашашт шотышто министрын пашажым жаплан шуктышо Г.Ширяева да молат ойленыт.

С.Носова.
М.Скобелевын фотожо.

Опубликовать в Одноклассники

Добавить комментарий