УВЕР ЙОГЫН

Усталык вашлиймаш: «Йӧраташ кӱлеш чыла: шочмо кундемым, пӱртӱсым…»

12 апрельыште Национальный художественный галерейыште Российын калык сӱретчыже, Марий АССР искусствын сулло деятельже, Олык Ипай лӱмеш да МАССР Кугыжаныш премий-влакын лауреатше Зосим Лаврентьев дене усталык вашлиймаш эртыш. 

Курыкмарий кундемын шочшыжо, уста шӱлышан мастар еҥ тудым кугу лӱмгечыжлан пӧлеклыш, вет шукерте огыл, 6 апрельыште, вачӱмбакше тудо 85 ийым пыштен.

Вашлиймашке мийыше-влакым Зосим Федоровичын тӱрлӧ ийлаште ыштыме кажне пашаже куандарен. Уста сӱретче идалыкын чыла пагытшым ойыртемалтше тӱсым кучылт моштымыж дене ончыкта. А графике пашаже-влакым автор йомакла негызеш уло шӱм шокшыжым пыштен ямдылен. Иктыже весыж деч ойыртемалтше, изиракшынымат, кугуракшынымат кумылыштым савырыше. Кажныштыже марий тӱс шижалтеш, тидын денак сӱретче да тудын пашаже-влак марий калыклан лишыл, шерге улыт. Портретше-влакат келге шонымашан улмышт дене ойыртемалтыт, эсогыл нунылан рамымат пеш чаплын келыштарыме.

З.Лаврентьевлан сар темат моткоч лишыл. Тудо шочмо Курыкмарий кундемже гыч сарын да пашан ветеранже-влакын портретыштым сӱретлен да икымше  гана Марий Элыште ялысе сӱрет галерейым почын.

Зосим Федорович марий сӱрет сымыктышым вияҥдымашке кугу надырым пыштен.

– Кеч-могай паша лектыш куандарыже манын, тудым йӧраташ кӱлеш. Йӧратымашын юзо вийже улак! Йӧраташ кӱлеш шочмо кундемым, ача-авам, йыр улшо пӱртӱсым, чон йодмо пашам да молымат, – палемдыш З.Лавреньев.

Юбилярым саламлаш Марий Эл правительстве председательын икымше алмаштышыже Михаил Васютин, тӱвыра, печать да калык-влакын пашашт шотышто министрын алмаштышыже Галина Ширяева, Росийысе художник-влак ушемын Марий Элысе пӧлкажын председательже Евгений Яранов, тыгак Зосим Федорович гаяк кугу лӱман сӱретче, лишыл йолташыже Александр Бакулевский да шуко молат толыныт.

Усталык вашлиймаш поро шӱлыш дене эртыш. Тушто чия мастарын пашаже-влакым ужаш веле огыл, шкеж дене чон почын мутланашат йӧн лие.

Зосим Федорович, эртыше юбилейда дене меат Тендам шокшын саламлена. Пеҥгыде тазалыкым, ласка илышым, усталык пашаштыда тӱвыргӧ лектышым да тыгаяк мыскара шӱлышан кодаш тыланена.

А.Байкова.
М.Скобелевын фотожо.

Опубликовать в Мой Мир
Опубликовать в Одноклассники

Добавить комментарий