МЕР ИЛЫШ

Ушем ден толкынлаште: Мер паша вес семынрак ворана…

Кодшо кугарнян «Марий национальный конгресс» мер толкынын черетдыме тӱшка погынымашыже эртен. 

Тидыже шукерте огыл мер толкынын вуйлатышыже-влак вашталтме дене кылдалтын.

Пытартыш отчёт да сайлымаш погынымаште вуйлатышылан МарНИИЯЛИ-н директоржо Евгений Кузьминым да исполкомжым вуйлатышылан «Кугарня» газетын редакторжо Эдуард Иманаевым сайленыт ыле. Манмыла, «у ӱштервоштыр у семын ӱштеш». У вуйлатыше-влак толкынын пашажымат изиш вес семынрак ворандараш темлат. Ушемын калыкыште шарыме тӱвыра да просветительский мер пашаже-влак шанче сынымат налшаш улыт. Санденак тенийлан ышташ палемдыме паша радамым угыч ончен лектыч.

Конгрессын еҥже-влак Мер Каҥашын палемдыме мероприятийлашкыжат кумылын ушнаш тӱҥалыт, но тылеч посна шкештат ятыр суапле пашам эртараш палемдышт. Мутлан, «Акпатыр» марий оперын икымше дирижёржо Г.Ф. Таныгинлан шочмо кундемыштыже мемориал оҥам почаш ямдылалтыт. Лӱмлӧ марий композитор А.Я.Эшпайланат мемориал оҥам почнешт. Тиде да моло пагалыме марий еҥ-влакын лӱмыштым калыкын шарнымаштыже кодымо шотышто Йошкар-Олан тӱҥ архитекторжо Василий Ершовынат темлымашыжым колышт лектыч. Лишыл жапыште ола администрацийыш икмыняр темлымаш почеш йодмашымат возышаш улыт.
С.Г.Чавайнын шочмыжлан 130 ий темме вашеш шанче-практик конференцийым эртарынешт. Конгрессын ончысо вуйлатышыже, кызыт республикын тӱвыра, печать да калык-влакын пашашт шотышто министрын алмаштышыже Михаил Матвеевын темлымыж почеш, кучем вуйлатышылан канидатурым чумырышо кадр резервышкыже чолга еҥ-влакым темлаш кӱлеш. Толкын тиде пашашкат ушнаш палемден.

Погынымашке республикын тӱвыра, печать да калык-влакын пашашт шотышто министржын алмаштышыже Галина Ширяева, айдемын праваже шотышто уполномоченный Лариса Яковлева, Марий Эл Правительстве Председательын икымше алмаштышыже М.Васютинын секретариатшым вуйлатыше Эдурд Чемышев толыныт ыле. Нунат конгрессын пашажым саемден колтымо шотышто ятыр темлымашым луктын ойлышт да кертме семын полшаш сӧрышт.

Шижалтеш, конгресс чынжымак палемдыме планым илышыш шыҥдаренак толаш шона, пашаштат саемшаш. Тидыже вуйлатыше-влакын ойлымышт гычат палдырныш. Исполкомын составшымат тиде амал денак уэмдыме йодышым каҥашышт. Тушто кумло утларак еҥ лийын гын, южышт ордыж велыш илаш кусненыт, паша верым вашталтеныт. Кайыше-влак олмеш тыгак чолга еҥ-шамычым сайлышт.

Исполкомын еҥже Анатолий Ишалинын школлаште тунемше-влаклан марий учебник-влакым лукташ тӱҥалме нерген йодышым тарватымыжымат ушештарыме шуэш. Образований да науко министерствын ончычсо пашаеҥже тиде йодышым уэш да уэш амал деч посна ок нӧлтал. Тидын шотышто Пошкырт кундем гычат эре гаяк вуйшиймаш пура. Ты шотыштат Марий конгресс лишыл жапыште шке ошкылжым ыштышаш.

Посна йодыш семын марий конгрессмен-влак Россий кӱкшытысӧ тӱрлӧ грант
проектлаш ушнаш кӱлмӧ нерген каҥашышт. Ты шотышто икымше ошкыл-влак улыт: кызыт кум проект дене кылдалтше паша ышталтеш. Мутлан, ик проектше тыгак шанче пашаеҥын икымше тӱнямбал сарыште лийше землякна-влакын мемориал книгаштым лукмо дене кылдалтын.

Авторжо шке пашаж дене палдарыш. Национальный конгресс вуйлатыше Евгений Кузьминын палемдымыж почеш, Россий кугыжаныш кӱкшыт гыч шке шонымашым шыҥдараш, мер пашам шукташ полшаш шийвундо ойыралтме йӧнлан эҥертыманак.

С.Носова.
А.Ишалинын фотожо.

Опубликовать в Одноклассники

Добавить комментарий