КУЛЬТУР ДА ИСКУССТВО

Марий Элысе тӱвыра аланысе специалист-влаклан пашаверым муаш куштылго?

Шукерте огыл Республикын Тӱвыра, печать да калык-влакын пашашт шотышто министерствыж пелен Образований шотышто художественный совет чумырген ыле. 4 апрельыште тиде совет Усталык ушем-влак пӧртыштӧ «йыргешке ӱстелым» эртарен. 

Тушко республикысе культур учреждений, тӱвыра да сымыктыш аланыште тыршыше-влаклан шинчымашым пуышо организаций-влак,  районласе тӱвыра пӧлка вуйлатыше да молат чумыргеныт.

Погынымаште эн кугу тӱткышым культур да сымыктыш аланыште пашам ыштыше специалист-влакым ситарыме йодышлан ойырымо. Вет тунем лекше студент-влакым шкенан кундемыште кодаш манын, чыла йӧным кучылтман. Тидлан кӧра йоча искусство школ, тунемме учреждений, пашам пуышо организаций шке коклаштышт кылым ыштышаш улыт.

– Тунемме учрежденийлашке целевой направлений дене районлаште кӱлшӧ специалист-влакым тунемаш налаш кӱлеш. Сандене верысе культур пӧлкалаште кушто могай пашаеҥ кӱлмӧ нерген палышаш улыт, – палемден каҥашымаште тӱвыра, печать да калык-влакын пашашт шотышто министр Константин Иванов. – Мутлан, Национальный президент искусство школышто районла гыч талантан ӱдыр-рвезе-влаклан тунемаш йӧным ыштыман. Тудым пытарымеке, нунылан культур колледжыште але вес тунемме тӧнежыште шинчымашым погаш кумылаҥдыман да умбакыжат нуным эскерен шогыман.

– Вашке тунемме идалык мучашлалтеш. Палантай лӱмеш культур да искусство колледжым тунем лекше студент-влакат чыланжак огыл гай паша верым муыныт. Иктышт Йошкар-Олаште кодыт гын, молышт шке районыштышт пашам ышташ кумылан улыт, – палдарен колледж вуйлатышын туныктымо паша шотышто алмаштышыже Ольга Данилова. – Тений тӱвыра да театр искусство факультетнам чылаже 57 (40 еҥ — очно) еҥ тунем лектеш. Тушечын 24 студентше район гыч улыт. Очно тунем лекше 12 студент гыч кандашынже паша верым муын огытыл.         

– Палантай лӱмеш культур да искусство колледжыште тунемше артист-кукловод-шамычым ме эскеренак шогена, а тунем лекмекышт, пашашке налына. Нунылан пашадарым тӱлена, илыме верым кычалаш, айлаш шке полшена. Кызыт мыланна марий рвезе-влак кӱлыт, – палемден Республикысе курчак театрын художественный вуйлатышыже Алексей Ямаев.

Тыгай мутланымаш моткоч кӱлешан. Лач тыге, каҥашен, культур да искусство аланлан кадрым ситарыме йодышым рашемдаш лиеш.

А.Байкова.

Если вы нашли ошибку, пожалуйста, выделите фрагмент текста и нажмите Ctrl+Enter.
Опубликовать в Мой Мир
Опубликовать в Одноклассники

Добавить комментарий