ӰДЫРАМАШ КОРНО

Илыш гыч: «Мӧҥгышкет кае да мале…»

Тиде заметкым Одноклассники сайтыште лудым. Моткоч келшыш, сандене тыландат лудаш темлем. 

«Ик жап такси водительлан пашам ыштышым. Марием деч, манмыла, чап-чара, кугу парыман, но эрыкан ойырлен кайышым. Пашам каргыме гай ыштышым: ончыч кӱсыным пӧртылтышым, вара ипотеке полшымо дене пачерым нальым. Калыкым тӱҥ шотышто йӱдым шупшыктышым.

Ик кечын заказ ала-молан кас гычак уке ыле. Кудалам тыге пуста ола урем дене, а йырым- йыр – тып-тымык. Эрла кредитым тӱлыман. Ончем, ик пӧрт воктене самырык пӧръеҥ шога, кидшым лупша. Воктенже чарнен шогальым: торашкак ок кудал, сандене 200 теҥгелан кутырен келшышна. Пӧръеҥ кабиныш шинче, иктым-весым умылкалаш тӱҥале…

– Йӱдым ӱдырамашвуя кудалышташ лӱдыкшӧ огыл мо? – кенета йодо.

Можым-кузежым кӱчыкын умылтарышым. Мыйын нерген мутланенак, палемдыме пӧрт, подъезд деке миен шуна.

– Ик йӱдыштӧ мыняр теҥгем ыштет? – кабин гыч лекмыж деч ончыч йодо.

– Тӱрлын: ик кечын – кум тӱжем теҥгем, весын – визытым, кумшын – иктым. Каныш кечын шукырак лектеш, – вашештышым.

Пӧръеҥ оксагалтаж гыч вич тӱжемаш купюрым лукто да мылам шуялтыш:

– Мӧҥгышкет кызытак кай да теммешкет мале.

…Тидлан куд ият эртыш. Чыла парымем тӱрыснек шӧрышым, сайрак вес пачерым нальым, ӱдырым ыштышым. Но тиде пӧръеҥым тачат шарнем. Поро Айдеме, мый тунам чынже денак малаш кудальым!»

М.ИВАНОВА.

Опубликовать в Мой Мир
Опубликовать в Одноклассники

Добавить комментарий