ТОШКАЛТЫШ

Воктенет – самырык еҥ: «Шочмо оламже кокыт»

Чолга марий рвезе Алексей Ибашев Омскышто шочын. Кызыт Сургут олаште ила. Верысе «Марий ушем» организацийым вуйлатышын алмаштыже. Ӱмаште тудо Сочишке, Самырык-влакын тӱнямбал фестивальышкышт, миен. Рвезе эре уым кычалеш, вияҥеш, мер пашашке кумылын ушна. 

– А илыме верым вашталташ шонымаш кузе лектын?

– Сургутыш армий деч вара илаш кусненам. Молан манаш гын лач армийыште лиймем годым тыгай шонымаш ушышкем толын пурен. Тиде кундемыште йӱштӧ гынат, мый тунемынам, молан манаш гын ача-авам мыйым кеҥежлан тышке родо-тукым деке канаш колтеныт. Но Омскымат ом мондо, туштат лиедем. Шочмо оламже мыйын ынде кокыт.

Сургутышто илаш тӱҥалмекем, таза илыш-йӱла деке мелын савырненам. «Газпром трансгаз Сургут» ООО-што пашам ыштем да тысе пашаеҥ-влакым спортлан шӱмаҥдем. Предприятийыше спорт секторым вуйлатышын алмаштышыже улам.

– Тугеже спорт илышыштет кугу верым налеш?

– Арняште кум гана спортзалыш коштам, куштылго атлетике дене кылым кучем. Компанийыште эртаралтше тӱрлӧ таҥасымаште вием тергем. 2015-2016 ийлаште сеҥышышкат икмыняр гана лектынам. Шкенан пожарный дружинын командыштыже улам. Компанийнан 26 филиалже-шамыч коклаште командына кумшо ий почела икымше верым налеш. «Йӱдвел мардеж» турист клуб дене походыш коштына, эҥер денат волена.

А кеҥежым велосипед дене кудалыштам. Тидыже тазалыкланат пайдале, пӱртӱсланат эҥгекым ок кондо. Телым верысе курык базыште ече дене коштам. Но тений тидлан жапым ойырен кертын омыл.

– Тый ятыр кундемыште лийынат. Могай вер эн чот шарнымашеш кодын?

– Изиэм годым Омск ден Сургут деч торашке ом кай манын шоненам, но илыш вес семын савыралын. Армийыште Уссурийскыште служитленам. Службым эртыме годым Владивосток ден Читаштат лийынам.

Башкортостанышкат икмыняр гана миенам. Египет ден Турцийыште каненам. Палыме-влак деке Казахстаныш, Кокчетав олашке, миен коштынам. Жал, Марий Эл марте миен шуын омыл. Ӱшанем, тиде шонымаш кунам-гынат шукталтеш да мый кугезе родо-тукымнан кундемыштыже уна лийын толам.

– Сочишке мийымет нерген изиш каласкале…

– Мый Хант-Мансий автономный округын делегацийыштыже лийынам. Фестивальыш кундемна гыч чылаже 40 еҥ миен. Конкурс кугу лийын: ик верыш 20 еҥ. Сандене тушко логалмемлан Юмылан тачат тауштем. Самырык-влакын тӱнямбал фестивальышт моткоч поян лийын. Южгунам, чыла вере шукташ манын, кече мучко 20 километрымат коштын савырнаш пернен.

Тушто ятыр еҥ дене палыме лийынам. Йот эл гыч мийыше студент-влак дене мутланыме годым нуно тӱвырашт, йылмышт, йӱлашт дене кунар-гынат палдареныт. Российын лӱмлӧ политикыштымат ужынам. Нунын коклаште йот эл паша шотышто министр Сергей Лавроват лийын. Тиде фестиваль мылам шуко пайдам конден, у шинчымашым пуэн, ончыко вияҥаш таратен.

– А «Марий ушемыш» кузе логалынат?

– Омскышто илымем годым ик марий еҥ денат вашлийын омыл. Авам марий гынат, йочапӧртыштӧ кушкын, садлан марла мутланаш йӧнжӧ лийын огыл. А Сургутыш куснымекем, ешын тукымвож пушеҥгыжым чумыраш тӱҥалынам. Тыге марий йылме, тӱвыра деке мелын савырненам. Варажым Сургутышто марий-влакын ушемышт нерген колынам, марий дискотекыш миенам. Эркын-эркын мер пашашке шупшылалтынам. Кызыт ушемна ятыр марий мероприятийым эртара. Поснак икшыве-шамычлан. Ме нуным изинек шочмо йылмылан, тӱвыралан шӱмаҥдена.

Тидын годым мый шкежат марла сайын мутланаш тунемам. Тыште мылам пелашем полша. Шукерте огыл шочшо ӱдырланнат шочмо йылмыжым туныкташ шонена. Мый марий улмем дене кугешнем.

Л.ШАБДАРОВА.

Если вы нашли ошибку, пожалуйста, выделите фрагмент текста и нажмите Ctrl+Enter.
Опубликовать в Мой Мир
Опубликовать в Одноклассники

Добавить комментарий