ТАЗАЛЫК

Медицине: Тургыжланаш амал уке

Марий Эл Республикын Тазалыкым аралыме министерствышкыже «Йошкар-Ола ола» ола кундемыш пурышо Якимсола, Савин ялла, Семёновка села да моло илемла гыч Семёновка врач амбулаторийым петырыме шотышто умылкалымашан йодыш-влак кечын пурат. 

– Семёновка селаште да тудын йыр верланыше яллаште илыше калык врач амбулаторийым петырыме шотышто арам тургыжлана, – манеш регионын тазалыкым аралыме министрже Марина Панькова. – Тиде медицине тӧнеж огеш петырналт, тылеч посна медицине полышым кумдаҥдаш, штатым пеҥгыдемдаш да пациент ден медперсонал-влакын условийыштым саемдаш палемденна.

2012 ий гыч Семёновка врач амбулаторий ик сменыште 1050 пациентым приниматлен кертше Йошкар-Оласе 2-шо №-ан поликлиникын филиалже семын пашам ышта. Поликлиникын составыштыже – 60 койкан кечывал стационар, кок фельдшер-акушер пункт да Семёновка врач амбулаторий. 2018 ийыште амбулаторий пелен 9912 еҥым пеҥгыдемдыме, ты шотышто – 2676 йочам.

Амбулаторий гыч поликлинике марте – кандаш километр, тиде коклам транспорт дене 20 минутышто кудал эрташ лиеш.

Кызыт Семёновка врач амбулаторийыште чылаже 12 врач: 4 участковый терапевт, 3 участковый педиатр, 3 стоматолог да 23 кокла медицине пашаеҥ пашам ыштат.

Пеҥгыдемдыме йоча чот норматив дене келшен толеш. Йоча стационар тӧнежлаште, кум школ-интернатыште, диспансеризацийым Йошкар-Оласе йоча эмлымверын врачше-влак эртарат.

Семёновка врач амбулаторийын пациентше-влак Йошкар-Оласе 2-шо №-ан поликлиникын да шке кундемысе амбулаторийын участковый врачше-шамычын приёмышкышт регионын Доктор12.РФ, Россий Федерацийын gosuslugi.ru порталышт гоч Интернет полшымо дене возалтын кертыт. Мӧҥгыштӧ тыгай йӧн уке гын, поликлиникын, тыгак амбулаторийын электрон регистратурыштлан, регистратур воктеке вераҥдыме инфоматлан эҥертен кертыт. Чот орланыше пациент-влакым поликлиникыштат, амбулаторийыштат черет деч посна приниматлат.

Амбулаторийыште 16 койкан кечывал стационар, клинике-диагностике лабораторий, прививкым ыштыме, процедур, функциональный диагностике, физиотерапевтический да рентген кабинет-влак улыт.

1983 ийыште шындыме флюорографым чот тоштеммыжлан кӧра кораҥдыме. Олмешыже весым шындаш йӧн уке, молан манаш гын тиде кабинетым илыме пӧртыштӧ ойырымо. Семёновка кундемысе калык флюорографий шымлымашым Йошкар-Оласе 2-шо №-ан поликлиникыште шочмын да шуматкечын эртен кертеш.

Семёновка врач амбулаторийын рентген аппаратше посна чоҥымо оралтыште верланен, тудо график почеш пашам ышта.

Врач амбулаторийыште ультразвук диагностике кабинет лийшаш огыл, сандене Семёновка кундемысе калык участкысе терапевтын направленийже дене 2-шо №-ан поликлиникыш миен, тыгак тиде процедурыш электрон йӧн дене возалтын кертеш.

Вӱрын биохимический анализшым поликлиникын лабораторийыштыже ыштат. Вӱрым амбулаторийыште налыт. Врач-специалист-влак ден лабораторий шуматкечынат пашам ыштат.

2018 ийыште «Ялысе доктор» программе кышкарыште Семёновка врач амбулаторийыш кок врач-специалистым колташ палемдыме.

М.ИВАНОВА.

Опубликовать в Мой Мир
Опубликовать в Одноклассники

Добавить комментарий