«МАРИЙ ЭЛ» ТАЧЕ

Газетнан унаже: Еҥ мала, а тудо лудеш

«Мо шкемым шарнем, эре «Марий Эл» газетым лудам. Йочам, самырыкем годым тудлан ачам ден авам возалтыныт. А 1978 ийыште Волжский районыш илаш куснымем деч вара подпискым шке ышташ тӱҥалынам. Сулен налме канышыште ынде индеш ий улам. Пенсием кугу огыл гынат, кажне пел ийын тӱрлӧ изданийлан кум тӱжем утла теҥгеаш подпискым ыштем», – манеш Морко районышто шочын-кушшо, Юлсер кундем Памар велсе Чодыраялыште ынде 40 ий илыше В.Большакова.

Южо еҥ тидлан огешат ӱшане, очыни, но Венера Николаевна кажне пел ийын «Марий Эл» + «Сурт-пече» комплектым, «Кугарня», «Семейная газета», «Волжская правда», «Волжские вести», «Морко мланде» газет ден «1000 советов», «1000 советов дачнику», «Моя прекрасная дача» журнал-влакым налеш.

Пытартыш жапыште, лудшо-влакым шукемдаш манын, изданий-влак подпискым ыштыме квитанций дене лотерей модмашым эртарат. Венера Николаевнат тиде йӧн дене пайдаланыде ок код. Тыге, «Марий Эл» газет редакцийын ик мешак шыдаҥжым, элктрочайникшым, а эн тӱҥжӧ кӱртньым левыктен келыштарыме чапле мангалжым модын налын. Ӱмаште икымше пелийыште «1000 советов» журнал ӱшанле лудшыжлан «1000 советов» всегда с вами» возыман солыкшым, а кокымшо пелийыште «1000 советов дачнику» манын возыман пледшым колтен. А «Моя прекрасная дача» журнал деч чолга ӱдырамаш 500 теҥгем модын налын.

«Газетыштыда мыланем чылажат келша, чылажымат куанен лудам. Ондакысе дене таҥастарымаште тӱшка озанлык-влакын илышышт нерген шагалрак возеда, но колхозшо пытен гын, мом ыштет? Шочмо калык марла лудшо, мурыжо, куштыжо манын, пеш шонем да… – чон коржынрак ойла Венера Николаевна. – Шкеже марий шӱлышан пайремым, концертым моткоч йӧратем. Йошкар-Олаште эртыше Марий касыш идалыклан ик гана миен толашак тыршем. Пеледыш пайремышкат марла чиен каем. Уныкам-влак дене шуко жапым эртарем: пырля У ийлан уремыште кожым шындена, сӧрастарена, купышто коньки дене мунчалтена, Ӱярня годым курыкышкат ий еда коштына. Тыгак пеледышым чот йӧратем, тудым чыла вере шындаш ямде улам. Уналанат чот куанем. Теве тыгайрак кова улам!» – мутшым мучашла еҥын тамле омо дене малыме годым оҥай газет ден журнал-влакым лаштыклаш йӧратыше мунло ӱдырамаш.

М.ИВАНОВА.

Опубликовать в Мой Мир
Опубликовать в Одноклассники

Добавить комментарий