УВЕР ЙОГЫН

Марий Элыште федеральныйлан шотлалтше 27 километр кужыт корным олмыктат

2018 ийыште Россавтодорын «Волго-Вятскуправтодор» ФКУ-жо Марий Элыште 19 километр кужыт федеральный корным олмыктышаш. Лишыл жапыште, корным олмыктымо пагыт тӱҥалмеке, дорожник-влак «Вятка» Р-176 трассын Медведево ден Оршанке районлам авалтыше 9 километран участкым уэмдаш пижыт. Тушто кажне шошым кугорно оварген нӧлталатеш. Ты верысе мландын ойыртемжым шотыш налын, специалист-влак дренаж системым саемдымылан да вӱдлан йоген каяш йӧным ыштымылан кугу верым ойырат. Дренаж коклаш  геотекстиль лончым вераҥдат. 

Капитально олмыктымо годым корным у семын ыштат: негызым  ачалыме регенераций йӧным кучылтыт, кутынь профильжым тӧрлатыме верыште корно «вургемым» тӱрыс вашталтат. Тыгак ты кумдыкышто вӱдым колтымо пучлам олмыктат, корно тӱрым пеҥгыдемдат да пале-влакым келыштарат.

Кугорно деч тораште огыл илыше-влаклан йӧнанрак лийже манын, йолын коштмо корнымат, остановкыламат уэмдат. Ты пашан кугу ужашыжым лачшымак тений шукташ палемдыме. Кодшыжым вес ийын шуят.  

Тиде сезоныштак федеральный дорожник-влак Звенигово районышто «Йошкар-Ола – Зеленодольск» А-295 – «Волга» М-7» автомобиль кугорнын 10 километран участкыжым саемдаш палемденыт. Тушто корнын  тӱжвал лончыжым уэмдат, тӱржым пеҥгыдемдат да вӱдлан йоген каяш волакым вераҥдат. Тыгак пассажир-влаклан шинчаш вич площадкым олмыктат, 768 метран барьер авыртышым да сигнальный 187 меҥгым угыч шогалтат. Кугыжаныш контракт почеш ты пашам тений октябрьыште мучашлышаш улыт.

2018 ийыште эше А-295 кугорныштак 6 километран участкым олмыкташ палемдыме. Тиде объектшым 2019 ийыште пашаш колтат.

Тений тыгак Йошкар-Олам эртен кайыме «Вятка» Р-176 кугорнын участкыжым уэмдат. Каласен кодыман: Марий Элыште федеральный кугорнын кужытшо тӱрысшӧ 229,4 километрыш шуэш.

С.Носова.

Опубликовать в Одноклассники

Добавить комментарий