УВЕР ЙОГЫН

Марий Элысе йоча-влак шке мастарлыкыштым конкурсышто ончыктеныт

30 мартыште Республикысе курчак театрыште «Пеледше тукым» республик кӱкшытан конкурс эртен. Ты гана йочасадыш коштшо икшыве-шамыч мурымаште, куштымаште мастарлыкыштым ончыктеныт. Ятыр номерже шошо пагытлан пӧлеклалтын. Шижалтын, ӱдыр-рвезе-влак шокшым вученыт, шошым шкешт деке ӱжыныт. Да тидыжым нуно ыштен кертыныт. Сӧрвалымыштым колын, сценыш мотор вургеман, пеледыш гыч ыштыме вуйшӱдышан Шошо толын да йоча-шамыч ден пырля модын, тавалтен. 

Жюри кажне коллективын, посна мурышын мастарлыкыштым аклен. Иктат пӧлек да Тауштымашан серыш деч посна кодын огыл. «Соло» номинацийыште  Йошкар-Оласе «Изюминка» йочасад гыч В.Козлова  «Чоя шошо» мурыж дене сенышыш лектын. Кокымшо верым Курыкмарий район Микрӓк школын школ деч ончычсо группышкыжо коштшо В.Романова «Пуры ирок, атиэм» мурыж дене налын. Кумшо вер Волжский район Шарача селасе «Ягодка» йочасад гыч М.Шураевалан логалын.

Шернур посёлкысо «Колокольчик» йочасадын рвезыже-влак «Эх, ну, Калтаса!» мурым туге устан йоҥгалтареныт, эсогыл залыште шинчыше-шамычат пырля  муралтен тавалтеныт. Изи артист-влак мурымышт годым тӱмырымат пералтеныт, гармоньымат шокталтеныт. Санденак жюри нунылан «Ансамбль-влакын мурымышт» номинацийыште икымше верым пуыде кертын огыл. Кокымшо верыш Медведево посёлко гыч «Золотая рыбка» йочасад гыч ӱдыр-влак лектыныт. Нуно «Марий лӱм» мурым веселан муралтен пуэныт. Кумшо Советский район Шуарсола школын школ деч ончычсо группо гыч йоча-влак лийыныт. Нунын такмакышт жюрин гына огыл, залыште шинчыше-шамычынат кумылыштым нӧлталын.

«Хореографий» номинацийыште сеҥышыш Волжский район Шарача селасе «Ягодка» йочасад гыч рвезе-влак лектыныт. Нунын шӱвыр дене мастарын  кушталтымышт кажнын кумылжым савырен. Санденак жюрин нунын икымше верым налмышт нерген увертарыме годым уло зал рӱжге куанен кычкырен. Кокымшо верым Медведево посёлкысо «Колокольчик» йочасадын ӱдыр-рвезыже-шамычлан «Ме марий улына» куштымашыштлан пуэыныт. Кумшо верым  Йошкар-Оласе «Ший оҥгыр» йочасадын икшывыже-влак налыныт. Нуно шовыч ден куштымашым ончыктеныт.

Тыгак посна приз дене Советский район Шуарсола школын школ деч ончычсо группыж гыч В.Козырева («Авамлан» муро), Параньга посёлкысо «Солнышко» йочасад («Шошо кумыл» куштымаш), Звенигово район Шолэҥер поселкысо «Родничок» йочасад («Кап-кап» муро) палемдалтыныт.

Л.ШАБДАРОВА.
М.Скобелевын фотожо.

Если вы нашли ошибку, пожалуйста, выделите фрагмент текста и нажмите Ctrl+Enter.
Опубликовать в Мой Мир
Опубликовать в Одноклассники

Добавить комментарий