КУЛЬТУР ДА ИСКУССТВО ТЕАТР

Театр илыш: «Кӧргӧ виян артист-влак дене кугешнаш кӱлеш»

20 гыч 26 март марте республикнан рӱдолаштыже «Театральный Йошкар-Ола» фестиваль эртен.  

Йыван Кырла лӱмеш национальный премийым налшаш верч республикысе чыла театр шке пашажым аклаш луктын. Тиддеч посна тений фестивальыш «Всё» усталык ушем, Оршанкысе Н.Лузгинов лӱмеш калык драме театр, тыгак посна автор-влакат (Курчак театрын самырык режиссержо Максим Белецкий ден  Россий Федерацийын сулло артистше Маргарита Медикова) шке пашашт дене ушненыт.

Куд кече жапыште Йошкар-Олаште илыше да тудын унаже-влак 13 спектакльым ончен кертыныт. Кажне постановкым Москва, Нижний Новгород, Челябинск, Санкт-Петербург гыч толшо критик-влак акленыт.

Сеҥыше-влакым Тӱнямбал театр кечылан пӧлеклалтше пайремыште саламленыт. Тудо ты гана Г.Константинов лӱмеш академический руш драме театрыште эртен. Молгунамсе семын залыште ончаш толшо-влак огыл, а республикысе театр-влакын артистышт, режиссёрышт, икманаш, спектакльым сценыш лукмаште тыршыше-влак лийыныт. Нуным пайрем дене Марий Эл правительстве председательын икымше алмаштышыже Михаил Васютин тӱвыра, печать да калык-влакын пашашт шотышто министр Константин Иванов саламленыт.

Тӱрлӧ номинацийыште сеҥыше-влак:

– Гран-при – «Иисус Христос — суперзвезда» (Э.Сапаев лӱмеш опер да балет театр);

–  Эн сай режиссура — Олег Иркабаев (Курыкмарий драме театр, «Савик»);

– Эн сай сценографий — Борис Голодницкий (Э.Сапаев лӱмеш опер да балет театр);

– Балетыште эн сай партий —  Э.Сапаев лӱмеш опер да балет театрын балет труппыжо;

– Оперыште эн сай партий — Дмитрий Семкин, Любовь Добрынина (Э.Сапаев лӱмеш опер да балет театр);  

– Драме спектакльыште эн сай ӱдырамаш роль — Юлия Охотникова (Г.Константинов лӱмеш академический руш драме театр);

– Драме спектакльыште эн сай пӧръеҥ роль – Николай Марышев (Курыкмарий драме театр);

– Курчак театрыште эн сай роль — Максим Белецкий;

– Кокымшо планан эн сай пӧръеҥ роль — Алексей Кудрявцев (Марий самырык театр), Владислав Калашников (Э.Сапаев лӱмеш опер да балет театр);

– Кокымшо планан эн сай ӱдырамаш роль — Светлана Строганова (М.Шкетан лӱмеш марий национальный драме театр), Ольга Федотова (Марий самырык театр), Алина Полевая (Э.Сапаев лӱмеш опер да балет театр);

– Эпизодысо эн сай роль — Сергей Гарашкин (Э.Сапаев лӱмеш опер да балет театр);

– «Эксперимент» – «Всё» усталык ушем;

– Жюрин ямдылыме посна премийже — Г.Константинов лӱмеш руш академический драме театрын актер группыжо, «Всё» усталык ушем, Ольга Жилинская (Э.Сапаев лӱмеш опер да балет театр); Анастасия Тораева (Курыкмарий драме театр);

– «Зритель-влакын симпатийышт» приз — Алексей Чистяков  (Э.Сапаев лӱмеш опер да балет театр);

– «Ӱшан» – Мария Ефремова (Оршанкысе Н.Лузгинов лӱмеш калык драме театр);

– «За честь и достоинство» – Олег Иркабаев (Марий самырык театр);

– СТД председательын премийже – Сергей Щеглов (Г.Константинов лӱмеш руш академический драме театр);

– Йошкар-Ола мэрын премийже — Людмила Иванова (театр сӱретче);

– Директорын премийже — Екатерина Байбаева (Э.Сапаев лӱмеш опер да балет театр);

– Йошкар-Ола депутат-влак погынымашын премийже — Ярослав Ефремов (Г.Константинов лӱмеш руш академический драме театр).

Сеҥыше-влакат пале улыт. А ындыжым театр-влаклан уэш вес фестивальлан ямдылалташ тӱҥалман.   Спектакльым аклыше жюрилан республикнан рӱдолаже, тӱвыра, сымыктыш поянлыкнам аралыме, тукым гыч тукымыш шуйымо пашам мастарын виктарыме да театр-влакын уста, кӧргӧ виян улмышт моткоч келшен. 

 А.Байкова.

Опубликовать в Мой Мир
Опубликовать в Одноклассники

Добавить комментарий