КУЛЬТУР ДА ИСКУССТВО ЭСТРАДЕ

Чолгалык: Поро кумылжо, сылне гармонь семже чоным ырыктат

Параньга районысо Кугу Пумарий селан эргыже Михаил Веселовым уста гармоньчо семын шукын палат. Пытартыш жапыште тудо сценыш весела такмакше-влак дене чӱчкыдынак лектеш, гармоньым шоктышо-шамычын конкурсышкыштат ушна. А кодшо ийын Миша Йошкар-Олаште эртаралтше «Ший памаш» конкурсышто чолгалыкым ончыктен, «Йолташ-шамычын ӱшаныштым сулышо»  да «Сценысе образлан» манме диплом дене палемдалтын. 

А тений кеҥежым гармоньчо 35 ийым тема. Изирак юбилейже вашеш М.Веселов тудын творчествыжым эскерыше-влаклан пӧлекым ямдыла. Могайым? Тиде да моло нерген умбакыже интервьюшто пален налаш лиеш.

– Миша, творчестветым эскерыше-влаклан пӧлекым ямдылаш мо таратен?

– Тений мыйын изирак юбилей, садлан творчествем эскерыше-влакланат да шканемат пӧлекым ямдылаш шонен пыштенам. Тидын марте репертуарыштем шуко муро погынен. Нуным чумырен, «Шке илыш нергенем» лӱман дискым лукташ шонем.

– Дискыште илыш нергенет пален налаш лиеш тугеже?

– Лиеш. Сценыш икымше гана 13 ияшем годым, 1996 ийыште, лектынам. Икымше муремат тыгак маналтын – «Шке илыш нергенем». Но тудым калык «Галина-Бланка» лӱм дене сайын пала. Такшым репертуарыштем чыла муремжат илыш денак кылдалтше улыт. Ешем, шочшем-влак, ялем, Марий кундемем, йӧратымаш, паша да моло теме дене такмак-влак шочыт.

– Гармоньым шокташ кӧ деч тунемынат?

– 12 ияшем годым шем мончаште гармонь паҥга-влакым темдыштынам. Татар рвезе Сидаль дене пырля ик классыште тунемына ыле. Тудо марий семым моткоч сайын  шоктен. Тудым ончен, кум кечыште тунем шуктышым. Кугурак изамынат шоктымыжым сайын шарнем. Чаманен каласыман, тудын ӱмыржӧ кӱчык лийын. Авамын шольыжат гармоньым, баяным шоктен, а кугезе кочам шӱвырым шкежак ыштен, шоктен. Сандене тиде мастарлыклан мыят тунемнем.

– Гармоньчым я сӱаныш, я пайремыш гармоньым шокташ ӱжыт. Тидлан кӧра ешыште умылыдымаш огеш лек?

– Уке, чылажымат пелашем дене мутланена, каҥашена. Пайремыш але сӱаныш пытартыш жапыште моткоч шукын ӱжыт. Саратов, Самара, Башкортостан, Киров, Сургут, Нефтекамск да моло кундем гыч ӱжмаш лийын. Но моло семын мыят пашам ыштем, сандене пешыже лекмаш уке. А шкенан республикыште пелашем дене пырля коштына. Ятыр сӱаныште лийынна, родо-тукымат иктаж пайремым сӧрастараш эреак ӱжыт, шуко рвезым армийыш ужатыме.

Кумданрак — «Марий Эл» газетын
2018 ий 27 мартыште лекше номерыштыже лудын кертыда.

 

Алевтина Байкова мутланен.

Опубликовать в Мой Мир
Опубликовать в Одноклассники

Добавить комментарий