КУЛЬТУР ДА ИСКУССТВО

Тӱвыра алан: «Йӧратем мый Шочмо элым!»

Республикыштына икымше гана чумыр марий хор ышталтын 

Теҥгече Э.Сапаев лӱмеш опер да балет театрыште Марий Эл Республикын Тӱвыра, печать да калык-влакын пашашт шотышто министерствыжын кумдаҥдыме  заседанийже эртыш. Тушто уло регионлан ик кугу йоча хор икымше гана мастарлыкым ончыктыш. Тиде событий Марий Эл Республикын историешыже возалт кодеш. Хорым тӱвыра, печать да калык-влакын пашашт шотышто министр Константин Ивановын шонымыж почеш да республикым вуйлатыше Александр Евстифеевын полшымыж дене чумырымо.

Хорышто Йошкар-Оласе да районласе сымыктыш школлаште тунемше йоча-влак улыт. Чылаже 450 икшыве. Хорын дирижёржо — Национальный президент искусство школын туныктышыжо, Марий Эл Кугыжаныш премийын лауреатше Лилия Семенова.

Погынымаште Марий йоча хор 12 мурым Э.Сапаев лӱмеш опер да балет театрын симфонический оркестржын шоктымыж почеш йоҥгалтарыш. Залыш погынышо-влак кажне произведенийым шокшо кидсовыш дене вашлийыч, а мучашлан, рӱж кынелын, ӱдыр-рвезе-влаклан да вуйлатышыжлан тауштышт. 

Кугу хорым уэш 8 майыште Сеҥымаш кечылан пӧлеклалтше мероприятийыште ужын кертына.    

А.Байкова.
М.Скобелевын фотожо.

Опубликовать в Мой Мир
Опубликовать в Одноклассники

Добавить комментарий