УВЕР ЙОГЫН ЯЛ ИЛЫШ

Ял илыш: Кӱшкырак нӧлталташ полшышаш

Марий Элыште Кресаньык (фермер) озанлык, ялозанлык кооператив да ялозанлык сатум ыштен налше моло еҥ-влакын ассоциацийыштым регистрироватлыме. 

Российысе Кресаньык (фермер) озанлык да ялозанлык кооператив-влакын ассоциацийышт (АККОР) кызыт 68 региональный кресаньык ушем ден ассоциацийым ушен шога. Ушем ден ассоциацийлаште район кӱкшытан 600 утла фермер организаций уло. Тушто чылаже 93 тӱжем фермер озанлык шотлалтеш. Ынде мемнан республикыштат тыгай ассоциаций уло.

Такшым тыгай ушем республикыштына ончычшат лийын, кодшо курымын 90-шо ийлаштыже тудын пашаже районлаштат воранен толын. Но тӱрлӧ амал дене тудо петырналтын. Ынде кӱлешыжым уэш келшышылан шотленыт. Тыге Марий Элыште ассоциацийын учредительже лияш 13 физический лица, тидын шотыштак 5 кресаньык (фермер) озанлык вуйлатыше ден 3 индивидуальный предприниматель келшеныт. Республикысе АККОР-ым вуйлаташ У Торъял район гыч фермер Г.Петров-Чоткарлан ӱшаныме.

Ты ушем АККОР член-влаклан ямдылыме ялозанлык сатуштым ужалыме,  услугым пуымо шотышто полшымо, кредитым налаш, лизинг дене пайдаланаш йӧным ыштыме, ушемын членже-влак коклаште кылым пеҥгыдемдыме шонымаш дене ышталтын.

В.Смоленцев.

Опубликовать в Одноклассники

Добавить комментарий