СОЦИАЛЬНЫЙ ИЛЫШ ӰДЫРАМАШ КОРНО

Пашаште –пиал: «Ешем гай улыт»

– Районыштына кажне социальный пашаеҥым сай велым палемдаш лиеш. Чылдемыр кундемыш каеда гын, тугеже Нольыкмарий ялыште илыше Эльвира Курочкина деке пурыза. Мийымыда нерген шижтаренат кертам, – ойыртемалтше социальный пашаеҥ нерген возаш шонымем пален налмек, Шернур районысо Калыкым социально обслуживатлыме комплесный рӱдерын граждан-влакым мӧҥгыштӧ ончымо пӧлкажым вуйлатыше Н.Терентьева мане. 

Но Эльвира Витальевна дене ялыште огыл, а Чылдемыр савыртышыште вашлийна. Эше лу шагатат уке, а тудо уже Шернур посёлко гыч пӧртылеш: шке манмыжла, шоҥгыеҥже-влаклан эмым налаш миен. Сумкаштыже эше тӱрлӧ когыльо да монь коеш.

– Илалше-шамыч свежа когыльым моткоч йӧратат. Шернурыш кайышашем пален налыт да тидым-тудым налаш йодыт. Посёлко гыч пӧртылмем изин-кугун вучат, эсогыл чайым шолтен ямдылат, – шыргыжале ӱдырамаш.

Эльвира Витальевна Курочкина (Шабердина) Шернур районысо Кугу Мушко ялыште шочын кушкын. Школ деч вара бухгалтерлан шинчымашым поген, но специальностьшо дене ик кечат пашам ыштен огыл: Нольыкмарий качылан марлан лектын, йочан лийын да тудын дене шинчен. А 2001 ийыште верысе администрацийыште пашам ыштыше Г.Богатырёва ден Н.Иванова Шернур районысо Калыкым социально обслуживатлыме комплексный рӱдерыш социальный пашаеҥ-влакым погымо нерген ойленыт. Эльвира тушко 17 мартыште каен да ты кече гычак пашам ышташ тӱҥалын.

– Ончыч куд еҥым пуэныт: кундемыштына моткочак пагалыме туныктышо Анастасия Ивановна Вязовам, Зинаида Егоровна Богдановам, Евдокия Алексеевна Никитинам, Анна Михайловна Озеевам, Юрий Николаевич ден Соня Михайловна Смоленцевмытым. Кажныжым мучаш марте онченам… – пашаш толмо жапшым шарналтыш Эльвира Витальевна. – Чыланат пеш ушан да поро улыт ыле. Толмем шӱм вургыж вученыт. Нунын дене лийме жапыште чарныде гаяк мутланеныт. Кажныжым тачат порын, эсогыл шинчавӱд йӧре шарналтем.

Кызыт Эльвира Витальевна 13 еҥым онча: латкоктынжо шке Нольыкмарий ялыштыжак илат, иктыже – Нурсолаште. Иван Гусев деч молыжо кугу ийготан улыт. Евдокия Архиповна Богатырёва (90 ияш) да Анастасия Фёдоровна Шабалина (79 ияш) гай илалше еҥже кундемыште кодынжат огытыл.

 

 Кумданрак — «Марий Эл» газетын
2018 ий 23 мартыште лекше номерыштыже лудын кертыда.

М.ИВАНОВА.
Авторын фотожо.

Опубликовать в Одноклассники

Добавить комментарий