КАЛАСЕ, "МАРИЙ ЭЛ"

Юрист умылтара: Кӧ мутым кучышаш?

Эргым школышто улмыж годым сусырген. Тидын шотыштак рашемдынем: йоча-влак икте-весыштым сусыртеныт гын, кӧ тыгай годым тидлан мутым кучышаш?

О.Михайлова.
Медведево посёлко.

Йодышлан Медведево районысо прокурорын полышкалышыже, юстицийын изирак советникше О. Г.Лесовщикова вашештен:

– Чынжымак, йочан образовательный учрежденийыште лиймыж годым сусыргымаш чӱчкыдын лиеда. «Россий Федерацийыште образований нерген» Федеральный законын 28-ше статьяж дене келшышын, тунемше-влакын тазалыкыштым пеҥгыдемдымылан да аралымылан условийым ыштыме образовательный организацийын компетенцийыжылан шотлалтеш. РФ законодательстве дене келшышын, образовательный организаций  тунемшыже, пашаеҥже-влакын тазалыкыштлан да илышыштлан мутым куча.

РФ Граждан Кодексшын 1073 статьяжын 3 ужашыж дене келшышын, 14 ийыш шудымо икшывылан, кунам тудо образовательный, медицине але моло организацийын эскерымашышт лийын, эҥгек ышталтын гын, тидлан мутым нине организаций-влак кучат. Ыштыме эҥгекыште нине организаций-влакын  титакышт уке гын веле ответственность кораҥдалтеш.

Тыге, образовательный процесс годым ик йоча весылан энгекым ыштен гын, мутым садак образовательный учреждений (йочасад, школ) кучаш тӱҥалеш.

Образовательный учреждений мутым кучымо деч тунам гына утаралтеш, кунам тудо тунемше-влакым эскерыше должностной лица-влакын титакышт уке улмым пеҥгыдемден кертеш.

С.Носова ямдылен.

Опубликовать в Одноклассники

Добавить комментарий