ОБРАЗОВАНИЙ УВЕР ЙОГЫН

Образований: Сайже деч сайжым палемденыт

Марий Эл вуйлатыше А.Евстифеев инноваций сынан туныктымо программым илышыш шыҥдарыше школ-влаклан полышым пуымо шотышто Марий Эл Правительствын  грантшым могай туныктымо верлан ойырымо кӱштымашеш кидпалыжым пыштен. 

Оласе школ-влак коклаште Волжск оласе, Йошкар-Оласе 29-ше ден 1-ше №-ан школ-влак ойыртемалтыныт. Ола шотан посёлкылаште верланыше Медведево гимназий, Красногорский посёлкысо,  Н.Заболоцкий лӱмеш Шернур посёлкысо 2-шо №-ан школ-шамыч грант дене палемдалтыныт. Селасе школла кокла гыч Марий Эл правительствын грантшым Морко районысо Коркатово лицейлан, У Торъял районысо Тошто Торъял кыдалаш школлан, Советский район Вечын селасе школлан ойыреныт.

Ушештарена, эн сай школ-влаклан грантым пуымо темлымашым Марий Эл вуйлатыше А.Евстифеев 17 январьыште республикысе Министр-влак кабинетын заседанийыштышт каласен. Тидлан кум миллион теҥгем ойырат. Кум эн сай оласе школлан (650 тунемше деч шагал огыл тунемшаш) – 500 тӱжем теҥгем. Посёлкысо кум эн сай школлан (500 тунемше деч шагал огыл тунемшаш) 300 тӱжем теҥге гыч пуат. Селасе кум эн сай школлан (100 тунемше деч шагал огыл тунемшаш) 200 тӱжем теҥге гыч ойыралтеш. Оксам республикын резервный фондшо гыч налыт.

Шийвундо учебниклан, туныктымо да воспитатлыме средствалан, школын кадр потенциалжым вияҥдаш кая. Пытартыш пунктшо договор почеш целевой направлений дене тунемше самырык педагог-влакым школыш пашам ышташ толаш таратышаш.

Грантым налше школ-влакым да тудын кугытшым ийлан кок гана комиссий ойыра. Тудын пашажым Марий Эл правительстве председательын икымше алмаштышыже М.Васютин вуйлата.

 Марий Эл Республикым вуйлатышын организаций-аналитике виктемжын уверже негызеш Л.ШАБДАРОВА ямдылен.

Опубликовать в Одноклассники

Добавить комментарий