РУБРИКИ

Форум: Пошкудынат опытшо пайдале

Чуваш Республикысе Батырево селаште мӱкшызӧ-влакын регион кокласе визымше форумышт эртен. 

Ты мероприятийыш Нижегородский, Ульяновск, Киров областьла, Чуваш, Татарстан ден Марий республикла гыч мӱкшызӧ-влак погыненыт. Марий кундем гыч мийыше делегацийым республикысе мӱкшызӧ-влакын «Марий отар» мер организацийжын председательже В.Южаков вуйлатен. Тудак республикысе мӱкшызына-влакын опытышт, улшо нелылыкым кузе сеҥен толмо, кугыжаныш могырым могай полышым пуымо, ончыкылык план нерген каласкален. Делегций радамыште мӱкшызӧ-влак ушем член, кугу опытан пчеловод-влак В.Григорьев, С.Лебедев, А.Швалев лийыныт.

Марий кундем гыч мийыше мӱкшызӧ-влак Батырево районыштак илыше, кумдан палыме да чапланыше пчеловод, зоотехник-консультант, Чуваш Республикысе ялозанлыкын сулло пашаеҥже Н.Пирожковын мӧҥгыштыжӧ, отарыштыже, озанлыкыштыже, кевытыштыже лийыныт, шуко оҥайым ужыныт да пален налыныт. Николай Петрович шкежат мемнан республикыште эртаралтше научно-практический конференцийлаште икмыняр гана лийын да тудын шке опытшо нерген каласкалымыжым чыланат тӱткын, чон шулен колыштыныт.

Кызыт Марий Элысе районлаште мӱкш ончышо-влакын тӱшка погынымашышт эрта. А март мучаште республик кӱкшытан конференций лийшаш.

В.Смоленцев.

Опубликовать в Мой Мир
Опубликовать в Одноклассники

Добавить комментарий