ЭКОЛОГИЙ

Айдеме да пӱртӱс: Юл эҥерыште мо ышталтеш?

Озаҥысе ратушышто Юл эҥерым лавыртымым пытарыме да тудым арален кодымо йодышлан пӧлеклалтше «йыргешке ӱстел» эртен. Тудым Россий Кугыжаныш Думын  Экологий да йырым-йырысе средам аралыме шотышто комитетше эртарен. Тушто тудын депутатше-влак, Татарстан Госсоветын, федеральный да регональный исполнительный кучем орган-шамычын еҥышт лийыныт. Марий Эл гыч пӱртӱс поянлык, экологий да йырым-йырысе средам аралыме министр Владимир Шутов миен.  

Мутланымаш годым тидым палемдыме: пытартыш лу ий жапыште Европын ик эн кужу эҥержын экологийже начарештын. Тӱҥ амалже эрыктыме системе-влакын тоштеммышт дене кылдалтын. А вет нуным эше кодшо курымын кудлымшо ийлаштыжак чоҥымо. Сандене кызытсе нелытым огыт чыте. Тиде амаллан кӧрак Юлышто погынышо лавыран ик кумшо ужашыжым йоген пурышо изи эҥер-влак кондат. Юл серым пеҥгыдемдаш манын, вӱдым аралаш полшышо чодыра кушкылымат шынден толман.

Мутланымаш годым рашемын: Юл эҥерыште эрыктыме сооружений-влакым ачалыме, чоҥымо йодышым рашемдымашке коммерческий структур-влакымат ушаш кӱлеш. Федерал кучемын шонымашыже лач тыгай.  

«Кугыжанышын эрыктыше у сооружений-влакым ыштымым але уэмдымыжым вучаш нимолан. Бюджетыште тидлан окса уке. Санденак регион-влак тиде пашалан инвестор-влакым кычалшаш улыт. Неле паша, молан манаш гын частный бизнеслан тидыже кӱлеш але уке – раш огына пале. Но икмыняр сай могыр тыштат уло. Мутлан, правительстве эрыктыме сооруженийын ямде лу типовой проектшым нунылан пуаш ямде, тидын годымак фирмын чоҥаш тӱҥалме пашажлан налме кредитшын процент ставкыжын ужашыжым тӱлаш полша, – палемден Кугыжаныш Думын депутатше, бюджет да налог комитетын членже Сергей Казанков.

2018 ийыште Юл эҥер дене кылдалтше йодышым илышыш шыҥдараш  федеральный бюджет гыч 480 миллион теҥге ойыралтеш. Субьект-влак эҥерым эрыкташ 20 миллион утла теҥгем налыт. А Юл бассейн 17 регионым авалта. Каласен кодыман: «Юлым тазаҥдымаш» программым илышыш шыҥдарыме пашалан  тӱрысшӧ 2025 ий марте  257 миллиард теҥгем ойыраш палемдыме.  

С.Носова.

Опубликовать в Одноклассники

Добавить комментарий