ЯЛ ИЛЫШ

Поро кумыл: Утарышыланна кызытат тауштен илена

Шукерте огыл пошкудем «Марий Эл» газетым кондыш да мане: «Ончо, мемнан районышто ик ковай ила, тудлан 100 ий темын». Статьям лудын лектым. Тиде ковайже Марий Пыламарий селаште шочын-кушшо Анна Дмитриевна Ведерникова улмаш. 

Тунамак ушем дене йоча пагытыш пӧртыльым.

1968 ий. Тунам мылам 8 ий ыле. 2 августышто мемнан вел марий-влак «Угинде» пайремым палемдат. Ты кечын калык шӱгарлашке коштеш. Тушко у емыжым, пакчасаскам наҥгая.

1 августышто Марий Купто ялысе йоча-влак, иквереш чумырген, «Кугу ото» чодырашке эҥыжым погаш куржна. Мый Веня изам почеш пижын кайышым. Тунам тудлан 10 ий ыле. Чылашт деч кузе торлымынам ом шарне, но чодыра гыч ме коктын гына лекна да мӧҥгӧ каяш тарванышна. Кужу жап ошкылна. Корныштына пӧръеҥым вашлийна. Но тудо марла ок умыло, а ме – татарла ойлымыжым. Сандене умбакыже ошкылна. Ындыже олык гоч кайышна. Кӱкшӧ вӱд башньым ончаш кӱлмым палена, но тудыжо шинчашкына эшеат пернен огыл. Погымо эҥыжнамат кочкын пытарышна. Кенета саде башне койылалтыш! Куанымына дене тудын велышке писынрак ошлкылаш тӱҥална. Но тиде мемнан ял огыл улмаш. Ме палыдыме ял воктеке ала-могай эҥер деке миен лектынна.

Туштак, пырчым эрыктыме левашыште, ӱдырамаш-шамыч пашам ыштат ыле. Иктыже мемнам ужылалтыш да кушеч толын лекмына, молан кугыеҥ деч посна улмына нерген умылкалаш тӱҥале. Изам пешыже ыш кутыро, а мый чодырашке эҥыжым погаш мийымына да йоммына нерген каласышым. Поро кумылан тиде ӱдырамаш мемнам мӧҥгышкыжӧ наҥгайыш, кочкаш пукшыш, мончаште мушко да малаш пыштыш. А тиде жапыште пелашыже Марий Пыламарий гыч Марий Купто почтыш йыҥгыртен да йоча-влакым мумо нерген уверым пуэн. Туштыжо чыланат мемнам чодыраште кычалыныт улмаш. Ме 12 километр ӧрдыжтӧ верланыше тиде ялыш миен лектына манын, иктат шоналтенат кертын огыл.

Эрдене палыме йӱкеш помыжалтна. Тиде ача ден авана мемнам налаш толыныт улмаш.

Тидлан 50 ий эртен гынат, изам дене ты томаша нерген чӱчкыдын шарналтена. Тунам Анна Дмитриевна Ведерникова мемнан утарышына лийын! Поро чонан улмыжлан тудлан моткочак кугу тау. Анна Дмитриевналан Юмо  тазалыкым пуыжо..

Римма Маякова.

Марий Турек район,  Марий Купто ял.

М.Скобелевын фотожо.

Опубликовать в Одноклассники

Добавить комментарий