МАРИЙ ТӰНЯ ШКОЛ ЙОЛГОРНО

Олимпиаде: «Шочмо йылме эн шерге пого»

Тыге ойленыт Марий кугыжаныш университетыште эртыше марий йылме, литератур дене республик да регион кӱкшытан олимпиадыш мийыше ӱдыр-рвезе-влак.  Республикысе олимпиадыште уш-акылым 115 ӱдыр-рвезе терген гын, регион-влак кокласе олимпиадыште – 17 тунемше. Регион-влак кокласышкыже Башкортостан (7 еҥ), Татарстан республикла (2 еҥ), Свердловск область (2 еҥ) гычат тунемше-шамыч толыныт. 

Регион-влак кокласе марий йылме олимпиадыште 11 классыште тунемше-влак коклаште  Шернур район Марисола школын тунемшыже О.Васеева сеҥен, кокымшо верым Башкортостанысе Мишкан район Чорай гимназий гыч А.Миксонова, а кумшо верым Башкортостанысе Янаул район Байгуза школ гыч В.Тапуева налыныт.

10-шо классыште тунемше-влак коклаште Морко район Унчо школын тунемшыже А.Дмитриева эн пӱсӧ уш-акылан улмыжым ончыктен. Кокымшо верыш Татарстанысе Мензелинск район Калтак школ гыч К.Димухаметова, кумшо верыш  Башкортостанысе Калтаса район Амчемучаш гыч Л.Арсланова лектыныт.

9-ше классыште тунемше-шамыч коклаште сеҥышын дипломжым Башкортостанысе Мишкан район Тымбай школ гыч А.Николаева налын. Кокымшо Советский район Ӱшнур школын тунемшыже А.Морозова лийын. Кумшо вер Башкортостанысе Калтаса район Амчемучаш школын тунемшыже Е.Изиляевалан логалын.

Марий литератур дене 11 классыште тунемше-влак коклаште  икымше верым Советский район Ӱшнур школ гыч Н.Петухова налын. Кокымшо верыш Татарстанысе Мензелинск район Калтак селасе школын тунемшыже Я.Яикбаева лектын.

10 классыште сеҥышын дипломжым Башкортостанысе Мишкан район Чорай гимназийын тунемшыже Н.Алексеевалан кучыктеныт. Кокымшо вер Морко район Унчо школ гыч Д.Оразаевалан логалын.

Кужэҥер район Коҥганур школышто тунемше К.Быкова 9-ше классыште тунемше-шамыч коклаште сеҥышыш лектын. Кокымшо верым Башкортостанысе Краснокам район Корий селасе школын тунемшыже А.Шамратовалан пуэныт.

– Тений марий йылме олимпиадылан туныктышем Светлана Мартыновна Максимова дене моткоч чот ямдылалтынна. Сеҥышыш лектам манын ӱшаненам. Шонымем шукталтын. Икмыняр ий олимпиадыш коштмем, тыршымем арам лийын огытыл. Школым тунем пытарымек, МарГУ-ш Калык тӱвыра да тӱвыра кокласе коммуникаций институтыш марий йылме пӧлкашкак тунемаш пурынем. Илышем шочмо йылме денак кылдынем, – каласыш марий йылме дене республикысе да регион кокласе олимпиадыште сеҥыше Олеся Васеева.

Л.ШАБДАРОВА.

Опубликовать в Одноклассники

Добавить комментарий