КУЧЕМ УВЕР

Сессий: Вашке аракам шонымо семын йӱын огыт керт

22 февральыште Марий Эл Республикын кудымшо созыв Кугыжаныш Погынжын 35-ше сессийже эртен. Тудын пашашкыже регион вуйлатыше  Александр Евстифеев ушнен. 

Тудо парламентарий-влаклан Марий Эл Республикын Конституционный судшын судьяжлан Павел Семеновым шогалташ темлымашым каҥашаш луктын.

– Павел Вадимович Семенов «Марий Эл Республикын Конституционый судшо нерген» законын пенгыдемдыме йодмашыжлан келшен толеш. Павел Вадимович 1955 ийыште Звенигово районысо Кокшайск селаште шочын. 1982 ийыште Казаньысе кугыжаныш университетым тунем пытарен. Павел Вадимович чыла комитетыште собеседованийым эртен, тудын шотышто замечаний лийын огыл. Поддержатлаш йодам, – каласен Марий Эл вуйлатыше Александр Евстифеев.

Шолып йӱклымаш почеш Павел Семенов Марий Эл Республикын Коституционный судшын судьяжлан сайлалтын. Тудын кандидатуржым сесийыште лийше 43 депутат гыч 40 еҥже поддержатлен. Тылеч вара Павел Вадимович товатмутым ойлен да должностьыш шогалын. Тыгак регион вуйлатыше Александр Евстифеевлан, парламентарий-влаклан поддержатлымыштлан тауштен да ӱшаным сулаш тыршаш тӱҥалмыж нерген каласен.

Але марте Павел Семёнов Марий Эл Республикын Верховный Судшын председательжын алмаштышыжлан тыршен. А кызыт шукерте огыл сулен налме канышыш лекше Георгий Михопаркиным алмаштен да Марий Эл Конституционный судын визымше судьяже лийын. Павел Вадимович – Марий Эл Республикын сулло юристше. Кугыжаныш награде-влак дене палемдалтын. Судьялан 32 ий утла пашам ыштен.

Ты кечын сессийыште депутат-влак тыгак тенийлан республикын  бюджетышкыже, бюджет да налог правоотношений-влак, еҥ-влакым социально аралымаш, инвалид-шамычлан инфраструктур объект-влакым йӧнаным ыштымаш, образований, тӱвыра, верысе самоуправлений, Кугыжаныш Погынын пашаже шотышто законлашке вашталтышым пуртеныт.

Тидын дене пырля республикыште алкоголян йӱышым рознично чыла вере огыл ужалаш лийме, «ондалалтше дольщик-влакын» праваштым аралыме, икымше йочам ыштымылан (усыновитлымылан) кажне тылзын ойыралтшаш  выплатым палемдыме да тудым илышыш пуртымо дене кылдалтше у закон-влакым каҥашеныт.

– 22 шагат кас гыч 9 шагат эр марте алкоголян йӱышым рознично ужалаш огеш лий. Исключений общественный питаний услугым пуымо годым гына ышталтеш. Тыгак посна кечылаште: 25 январьыште – Россий студенчестве кечын, 1 июньышто – Йоча-валкым аралыме тӱнямбал кечын, 27 июньышто – Самырык-влак кечын, 1 сентябрьыште – Шинчымаш кечын – аракам ужалыме шотышто ограничений лиеш. Тиде пайрем рушарнялан логалеш гын, вес паша кечынже тудо шукталтеш. Тыгак 17 ноябрьыште – Студентын тӱнямбал кечынже. Тиде закон тений 1 апрель гыч илышыш пура да 2020 ий 1  апрель марте шукталташ тӱҥалеш. Тиде жап ты законын пашам ыштыме мониторингшым эртараш палемдалтын, – каласен республикын Кугыжаныш Погынжын законодательстве шотышто комитетшын секретарьже Александр Павлов.

Сессийыште депутат-влак тыгак Марий Элысе МВД министрын, республикын Кугыжаныш шотлышо палате председательжын ты ведомстве-влакын кодшо ийын шуктымо пашашт нерген отчетыштым колыштыныт,  Кугыжаныш Погынын марий парламентын эртыше ийысе пашаже да Марий Эл Республикын законодательствыжын состоянийже нерген  доклад-влакым пеҥгыдемденыт.  

Л.Камалетдинова.

Опубликовать в Одноклассники

Добавить комментарий