СОЦИАЛЬНЫЙ ИЛЫШ

Медицине: Томограф да томографий шумлык…

9 февральыште Марий Элын медицине пашаеҥже-влак Моско специалист-шамыч дене пырля «МРТ-диагностикын кӱлешан йодышыжо-влак, тачысе шинчаончалтыш» республик кӱкшытан научно-практический конференцийыште участвоватленыт. 

Пытартыш 20 ий жапыште магнит-резонанс томографий ик эн сай диагностике йӧнлан шотлалтеш. Тудо писын вияҥеш, медицинын чыла гаяк кумдыкыштыжо кучылталтеш. 

Марий Элыште икымше магнит-резонанс томографийым 1994 ийыште Республикысе клинический эмлымверыш шындыме. Кызыт регионысо медицине организацийлаште вич компьютер томограф ден вич МРТ пашам ыштат: кокыт – частный клиникыште, кокыт – Республикысе клинический эмлымверыште да икте – Йошкар-Оласе эмлымверыште.

2016 ийыште республикыштына МРТ йӧн дене 11,1 тӱжем шымлымашым эртарыме, 2017 ийыште – 12,1 тӱжем шымлымашым. Тичмаш налмаште, специальный да поснак неле шымлымаш кокла гыч лучевой манмыже 2 процент деч шуко огеш эртаралт, но тудын деч посна онкологий, неврологий, кардиологий гай медицине направлений-влак кӱлын вияҥын огыт керт.

Республикысе компьютер томограф да магнит-резонанс томографий аппаратур парк Медицине полышым яра пуымо кугыжаныш гарантий программе кышкарыште Марий Элысе медицине тӧнеж-влаклан кӱлешан процедурым тичмашын эртарен кертеш. Тыгодымак, пациент келшыше шымлымашым эртен, а врач данныйым чын аклен кертышт манын, клинический подразделений ден лучевой диагностике службо кокласе кылым саемдаш кӱлеш.

Конференцийыште МРТ-диагностике йӧн дене кумдан пайдаланыме, технический модернизаций да медицине организацийлашке кӱлешан у оборудованийым ситарыме, диагностике службын пашажым ворандарен колтымо, персоналын квалификацийжым нӧлталме йодыш-влакым кумдан лончылымо.

РФ Тазалыкым аралыме министерствын Эмлыме-реабилитацийым эртарыме рӱдерыштыже лучевой диагностике рӱдерым вуйлатыше, Рентгенолог да радиолог-влакын Российысе обществыштын президентышт Валентина Синицынан МРТ шымлымаш-влак нерген лекше манеш-манеш шотышто докладше шуко еҥлан келшен.

Н.Н.Блохин лӱмеш Российысе онкологий науко рӱдерын вӱдышӧ специалистше Вадим Панов онкопатологийым МРТ йӧн дене шымлыме шотышто шергакан ой-каҥашым пуэн.

М.ИВАНОВА.  

Опубликовать в Одноклассники

Добавить комментарий