КУЛЬТУР ДА ИСКУССТВО ТЕАТР

Елизавета Стрельникова: «Театр — мыйын илышем, чон куанем»

Йоча годым, вожылмым шотыш налде, чылан гаяк мураш, кушташ мастар улыт. Сандене ончыкыжым артист лияш шонымо нерген ойлат. Теве Марий Турек районысо Аимке ялыште шочын-кушшо Лизанат тыгай мастарлыкше палдырнен. Изинекак артист шӱлышан лийын. «Эҥер вӱд ӱмбалне», «Аваем ит вурсо» муро-влакым мураш йӧратен. А ял калык тудым куанен колыштын да    тыге ойлен: «Артистак лият, Лизук». Школышто тунеммыж годымат ӱдыр тӱрлӧ кружокыш коштын. Но эн чотшо почеламутым сылнын лудаш йӧратен. 

– Пырля тунемме йолташем-влак дикторланат каяш темленыт, но кандашымше классым тунем лекмеке, культпроссветучилищыш куштымаш отделенийыш пураш шоненам. Шонымашышкем шуын кертын омыл. Авам тунам чот вурсен, – шарналта Елизавета. – Индешымше классым тунемаш Марий Турекыш каяш логале. Авам ик ырымат пуэн ыш колто. Йӧра кеч тӱшкагудышто иленна, школышто ик гана пукшеныт.

Тиддеч вара Елизавета Йошкар-Олашке толын да 13-шо №-ан ГПТУ-шко контролёрлан тунемаш пурен. Туддеч вара «Электроавтоматике» заводышто пел ий пашам ыштен да Курчак театрыш пашаш миен.

«Уныкам семын нунын дене мутланем»

– Ик газетыште Курчак театрыш самырык артист-влакым пашаш ӱжын возымо увертарымашым ужынам ыле. Мийымеке, театрын режиссержо ден директоржо мыйым ончышт да пашаш лекташ ойлышт, – ойла актрисе. – Тӱҥалтыште тунемше семын лийынам. Кид моткоч ноя, волен кая ыле.

Тудо жапыште ӱдыр Марий Элын калык артистше Галина Ларионован, тыгак Иван Рябининын  пашаштым ончен куанен да лач нунак ончыкыжым тудым пашам ышташ кумылаҥденыт. Икымше гана тудлан «Солнышко и снежные человечки» спектакльыште Дворникын рольжым ӱшаненыт, но Елизавета Стрельникова тиде рольым чоҥен моштен огыл.

– Режиссерат туныктен ойлен, но, кеч шортын-шортын толашенам шот лектын огыл,, – шарналта Е.Стрельникова.  – Варажым Лум пырче лийынам.

Тиддеч вара Елизавета Алексеевна могай гына спектакльыште кӧм гына модын огыл?! «Колобокышто»  – Рывыж, «Теремокышто» – Ужава, «Приключение поросёнка Фунтикаште» – Беладонна, «Золушкаште» – Изава, «Серебряное копытце» спектакльыште –  Пырысиге да молат.  Нылле утла ий жапыште кажне рольжо тудлан лишыл да шерге, йӧратыме лийын шуктен. Курчакше-влак дене ончыч тудо икшывыже, а кызыт уныкаже семын мутлана, чонжым почеш.

– Тудо пагытыште репертуарыште марий спектакль шуко лийын. Гастрольышкат чӱчкыдын лектынна, республикна мучко коштынна, Башкирийышкат миенна, – тургыжлана Елизавета Стрельникова. – Чаманен каласаш кӱлеш, тачысе кечылан марий спектакльым огына мод.

Йоча пагыт — эн сылне

Вачӱмбаке кеч-мыняр ийым пыштет гынат, йоча годсо пагыт, шочмо мланде эреак ушыш пурат. Чарайолын, мардежла куржталме пагытшым Елизавета Алексеевна кызытат порын шарна:

Ялна воктене курык ыле. Тудын тайылыштыже, шунан верыште, йоча-влак шукын погынена ыле. Мом гына ме тушто нӧштылын огынал?! Мелнам, калачым да молымат. Тудо тураштак лаптала модмо шарналтеш. А телымже икте-весым лумышто пӧрдалтарен модына ыле. Школыш коштмо портфель дене курык гычат мунчалтенна. Оза пӱнчерыш куржталыштынна. Ӱдыр-рвезе-влак погынен, тӱрлӧ семын модынна, а кеҥежым снегым погенна. А кызыт тушко нигӧ огеш кошт, пӱнчерат кушкын, ялысе уремыштат еҥым шагал ужат. Эх, вашлияш ыле тунамсе йолташ-влакым. Тунамсе пагыт эн весела, эн оҥай лийын улмаш. Илен-толын, вара веле тидым умылет улмаш.

Елизавета Алексеевна ялже, шым икшыван ешыште кушмо пагытше нерген мутлана да шинчавӱдшат лектеш. А кызыт чоным куандараш але ял илышым шарналташ Елизавета Алексеевна ола воктенсе садышкыже коштеш. Чодыра коклаште шуйналтше кадыр-кудыр йолгорно дене ошкылмыж годым, самырык пагытшым шарналтен, муралташ йӧрата.

– Тыге чонышто куштылгырак лиеш, – манеш актрисе. – Шошым-шыжым пакчаште шкетынак шогылтам, вет колхоз ешыште шочын-кушкынам, изинекак пашам ыштен тунемшылан нимо йӧсӧ огыл.

Еш илышыже

Елизавета Алексеевна ден пелашыже (шым ий ончыч уке лийын — авт.) ӱдыр ден эргым ончен куштеныт, йол ӱмбак шогалтеныт. Кумылым нӧлташ кум уныкаже коклан толын каят. 

– Икшывем-влакат изинекак театрыш пеленем коштыныт, но иктыжат театрлан шӱмаҥын огыл, – мут мундыражым ронча актрисе. – Театр — уло илышем, куанем. Тышке толмеке, мыйын чон кана, кумыл нӧлталтеш.

Алевтина Байкова.

(Фотом Курчак театр гыч налме.) 

Опубликовать в Мой Мир
Опубликовать в Одноклассники

Добавить комментарий