КУЛЬТУР ДА ИСКУССТВО ТЕАТР

Самырык артист дене палдарена: Коваже марла мутланаш туныктен

Пытартыш жапыште Йоча да самырык-влаклан театр-рӱдерыште самырык артист-влак рольым модыт. Нунын кокла гыч иктыже — Наталья НИКОЛАЕВА. 

Наташа Советский районысо Вечын села гыч. Верысе школышто шинчымашым поген. Тунамак мураш, почеламутым сылнын лудаш йӧратен. Ик гана веле огыл тыгай шотан конкурсышто мастарлыкшым терген, сеҥыше-влак радамыштат лийын. 9-ше классым тунем лекмеке, йолташыже-влак чылан гаяк школ гыч каен, ссузыш тунемаш пураш шоненыт.

– Мыят артист лияш шоненам. Палантай лӱмеш тӱвыра да сымыктыш колледжыш тунемаш пурымо нерген уверым интернетыште шкеак кычалын муынам, йыҥгыртенам да экзаменым эрташ толынам, – школ годсо пагытшым шарналта Наташа.

Ӱдыр пашалан чулым, шонен пыштыме сомылжым шукташ манын, уло ӱнаржым пыштен тырша. Санденак тунемашат пурен кертын.

– Студент пагыт — эн весела, эн оҥай. Тудо моткоч писын эртен кайыш, – ойла ӱдыр. – Нылымше курсышто тунемме годым группына дене Казахстанысе Кокшетау олаш миен толмо шуко жаплан шарнаш кодеш. Фестивальыште ме «Про мою маму и про меня» спектакльым ончыктышна. Тушто мый аван рольжым модынам, «Эн сай ӱдырамаш роль» номинацийыште палемдалтынам. Жюрин кӱкшын аклымыже умбакыжат пашам тыршен ышташ кумылаҥден.
Колледж деч вара Йоча да самырык-влаклан тетар-рӱдерыш пашам ышташ толмеке, эн ончычак Наташ «Кай, кай Йыванлан» спектакльыште массовкышто модын. Тиддеч вара «Корнывож пеледышыште» тӱҥ рольым модын, варажым «И с нами голуби» (Сима), «Кунам толат, авай?» (Люба) спектакльлаште интернатысе йочам. Тиддеч посна ятыр йоча постановкышто рольжо уло.

Наташа – весела кумылан ӱдыр. Сандене тудлан комедийыште модаш утларак келша. Мыскара сценке-влакымат йолташ ӱдыржӧ дене моткоч оҥайын ончыктат. Ялысе кова-влакын оласе самырык-влак семын илымышт нерген сценкым кодшо ийын шкеат ужынам ыле. Кертыт, сайын воштылтышт тунам.

– Мыскара сценкына кумыт уло. Тудым мыланна режиссер, Марий Эл Республикын калык артистше Зинаида Васильевна Долгова возен, – палемден Н.Николаева.

Наташа – марий ача-аван ӱдыржӧ, шукыж годым рушла мутлана. Марий спектакльлан рольым тунемме нерген шкеже тыгерак ойла:

– Спектакльлаште ойлымо шомакым лӱмынак тунемын шинчымаш уке, репетиций жапыште шарналт кодеш, сандене ты шотышто нимогай нелылыкым ом шиж. Марий йылмым школышто ме кугыжаныш йылме семын тунемынна. А яндарын мутланаш ковам деч тунемынам, вет эше школыш кайыме деч ончычак кок ий Морко районысо Нуръял Корамасыште ковам дене иленам.

Кызытат тудын деке унала мийыме годым шочмо йылме дене мутланена.

А.Байкова.

Если вы нашли ошибку, пожалуйста, выделите фрагмент текста и нажмите Ctrl+Enter.
Опубликовать в Мой Мир
Опубликовать в Одноклассники

Добавить комментарий